Shvetsiya Ukrainaga harbiy yordamni 4 baravarga oshirishini e'lon qildi

Shvetsiya yangi hukumati Ukrainaga harbiy va gumanitar yordam uchun 350 million dollardan ortiq mablagʻ ajratadi. Bu haqda Local Sweden portali xabar berdi.

Shvetsiyaning yangi hukumati Ukraina uchun yangi, qiymati 3 milliard kron (287 million dollar) harbiy yordam paketi va yana 720 million kron (69 million dollar) gumanitar yordam paketini e'lon qildi.

Jahon agentliklarining xabar berishicha, Shvetsiya mudofaa vaziri Pal Yunson yangi paketga, xususan, havo hujumidan mudofaa tizimlari va Shvetsiya armiyasi omborlaridagi oʻq-dorilar boʻlishini ma'lum qilgan.

Bosh vazir Ulf Kristersson matbuot anjumanida ushbu harbiy yordam paketi avvalgi sakkiztasining hammasidan kattaroqligini ta'kidladi va Shvetsiya Ukrainaga aynan ukrainaliklarning ustuvor roʻyxatiga binoan qurol topshirishga qaror qilganini qoʻshimcha qildi.

Shvetsiyaning avvalgi sotsial-demokratik hukumati Ukrainaga umumiy qiymati bir milliard krondan ortiq boʻlgan bir nechta harbiy yordam paketlarini bergan va bu paketlar orasida tankga qarshi tizimlar, oʻq-dorilar, shlemlar va oʻq oʻtkazmaydigan jiletlar ham bor edi.

Joriy yilning sentyabr oyidagi saylovlardan soʻng bu hukumat oʻrnini Kristerson boshchiligidagi oʻng va oʻng-markaz partiyalari koalitsiyasi egallandi.

Reuters agentligining qayd etishicha, yangi paketga Ukraina soʻragan Shvetsiya-Norvegiya yuqori texnologiyali Archer oʻziyurar gaubitsalari kirmaydi, biroq mudofaa vaziri Yunson ular kelgusidagi paketlarga kiritilishini istisno etmadi. “Zamin” yangiliklarini “Telegram”da kuzatib boring