Shotlandiya millatchilari partiyasi (ShMP) 27 mart kuni Hamza Yusufni partiyaning navbatdagi rahbari etib tanladilar. 37 yoshli musulmon hukmron ShMP etakchisi sifatida Nikola Styorjen oʻrnini egallaydi va yarim avtonom hukumat rahbari boʻladi. Bu haqda Al Arabiya xabar berdi.
Yusuf Shotlandiyaning Angliya bilan 300 yillik ittifoqiga barham berish asosiy maqsadi boʻlgan partiyani boshqaradi.
Yusuf birinchi turda ShMP a'zolarining 24 336 ovozini toʻpladi, uning asosiy raqibi, Shotlandiya moliya vaziri Keyt Forbs 20 559 ovoz bilan ikkinchi oʻrinni egalladi. Esh Rigan 5599 ovoz bilan uchinchi boʻldi.
Endi Yusuf mamlakat parlamentida ovoz berish jarayonida gʻalaba qozonsa, chorshanba kuni Shotlandiya rahbari sifatida qasamyod qiladi.
Yusuf — Shotlandiya mustaqilligi tarafdori. Uning otasi pokistonlik, onasi esa keniyalik, oʻzi Glazgoda tugʻilgan.
Angliya, Shotlandiya, Uels va Shimoliy Irlandiyani oʻz ichiga olgan Birlashgan Qirollikning 68 millionlik umumiy aholisidan taxminan 5,5 millionini shotlandlar tashkil qiladi. Mamlakat 1999 yildan boshlab oʻz parlamenti va hukumatiga ega.
Shotlandiya mustaqilligi boʻyicha birinchi referendum 2014 yilda oʻtkazildi. Unda mintaqada yashovchi fuqarolardan «Mamlakat mustaqil boʻlishi kerakmi?» degan savolga javob berish soʻralgan edi. Yakuniy natijalarga koʻra, ovoz berganlarning 55,3 foizi ajralib chiqishga qarshi boʻldi, 44,7 foizi esa mustaqillikni yoqladi.
2022 yil noyabr oyida Buyuk Britaniya Oliy sudi Britaniya parlamenti roziligisiz Shotlandiya ikkinchi marta mustaqillik referendumini oʻtkaza olmasligi haqida qaror chiqardi.
“Zamin” yangiliklarini “Telegram”da kuzatib boring
