Erdoʻgʻon Mirziyoevga Turkiyaning Togg elektromobilini sovgʻa qildi (video)

^{Foto: Turkiya prezidenti matbuot xizmati}

Turkiya prezidenti Rajab Toyyib Erdoʻgʻon va rafiqasi Emine Erdoʻgʻon mamlakatda ishlab chiqarilgan Togg T10X elektromobilining birinchi egasi boʻldi. Erdoʻgʻon elektrokar Ozarbayjon prezidentiga ham yuborilgani va Oʻzbekiston rahbariga ham sovgʻa qilinishini aytdi. Bu haqda TRT Haber xabar berdi.

Turkiya rahbari Ozarbayjon prezidenti Ilhom Alievga yetkazib berish amalga oshirildimi yoki yoʻqmi degan savolga bu amalga oshirilishini, yuboriladigan transport vositasining rangi qizil ekanini aytdi. Shuningdek, Erdoʻgʻon mazkur avtomobil Shavkat Mirziyoevga ham yuborilishini qoʻshimcha qildi.

Anqaradagi prezident majmuida avtomobil kalitlarini tantanali topshirish marosimi boʻlib oʻtdi.

“Bugundan boshlab biz Togg'ni yoʻllarda koʻramiz”, — dedi Turkiya prezidenti.

Erdoʻgʻon birinchi Togg elektromobilining yaratilishi va ishlab chiqilishi, uning bugungi darajaga koʻtarilishi texnologik va iqtisodiy taraqqiyot, Turkiyaning jahon miqyosidagi obroʻ-e'tibori ramzi ekanini ta'kidladi.

U Togg nafaqat Turkiyada, balki butun dunyoda avtomobil ixlosmandlari orasida shuhrat qozonishiga ishonch bildirdi.

Togg 160 kilovatt quvvatga ega akkumulyatorli, bir quvvatlanishda 314 kilometr masofani bosib oʻtishga qodir. Elektrokarning eng arzon modeli 953 ming lira (50 ming dollardan ortiq), kuchliroqlari 1,215 million turk lira (63 ming dollar) turadi. Birinchi yetkazib berish iyul oyiga rejalashtirilgan. 

Шухрат Раззаков

«ZAMIN.UZ» muharriri