Rossiya Zaporoje viloyatidagi mehmonxonani o‘qqa tutdi

Kecha, 10 avgust kuni Rossiya kuchlari Ukrainaning Zaporoje shahridagi mehmonxonaga raketa zarbasi berdi.

Zaporoje viloyati harbiy boshqarmasi rahbari Yuriy Malashkoning ma’lum qilishicha, hujum oqibatida 1 kishi halok bo‘lgan. 16 kishi, jumladan, 4 nafar bola jarohat olgan.

«Strana.ua»ning yozishicha, Zaparoje shahriga «Iskander-K» raketasi bilan zarba berilgan.

Ukraina prezidenti Vladimir Zelenskiyning so‘zlariga ko‘ra, Zaporojega raketa hujumidan keyin yong‘in boshlangan. Zelenskiy Rossiya qo‘shinlarini o‘qqa tutishda aybladi.

Rossiya qo‘shinlarining Ukrainaga bostirib kirishini qo‘llab-quvvatlovchi ayrim Telegram kanallar, rus qo‘shinlari NATO askarlari va Ukraina qurolli kuchlari jangchilari joylashgan joyga zarba bergani haqida yozdi. Biroq hozircha Rossiya Federatsiyasi mudofaa vazirligi bu raketa hujumiga izoh bermadi.