Estoniya bosh vaziri erining Rossiyadagi biznesi uchun uzr so‘radi, ammo iste’fodan bosh tortdi

^{Foto: Global Look Press}

Estoniya bosh vaziri Kaya Kallas Ukrainada urush boshlanganidan keyin ham turmush o‘rtog‘ining kompaniyasi Rossiyadagi faoliyatini davom ettirgani uchun uzr so‘radi.

“Bundan xafa bo‘lgan barchadan, albatta, uzr so‘rayman, lekin o‘zimning ma’naviy baholarim uchun javob beraman. Men haliyam keng ko‘lamli urush holatida Rossiya bilan munosabatlarni saqlab qolish ma’naviy nuqtai nazardan noto‘g‘ri deb hisoblayman. Buni to‘xtatish kerak, barcha Estoniya bizneslarini shunday qilishga chaqiraman”, — dedi u.

Kallasning aytishicha, eri o‘z kompaniyasidagi ulushini “sendvich narxida sotib yuborgan” va shu tariqa “javobgarlikni so‘zda emas, balki harakatlar bilan o‘z zimmasiga olgan”.

Shu bilan birga, Kallas bosh vazirlikdan o‘z ixtiyori bilan iste’foga chiqish niyati yo‘qligini aytdi, muxolifatga esa unga nisbatan ishonchsizlik votumi tashkil etishga urinib ko‘rishni taklif qildi.

Estoniya hukumatidagi mojaro

Kaya Kallas, Rossiyaning Ukrainaga bosqinidan so‘ng, doimiy ravishda Rossiyaga nisbatan eng qat’iy pozitsiyani egallab keladi, u Moskva bilan aloqalarni butunlay uzish tarafdori. Estoniya Rossiya fuqarolariga o‘z hududiga kirishni taqiqladi; mamlakatda ko‘plab sovet yodgorliklari ham demontaj qilindi.

24 avgust kuni OAVda Kallasning eri Arvo Hallikning Rossiyada biznesi borligi haqida xabarlar tarqaldi. Ma’lum bo‘lishicha, Kallas Rossiyada biznes yurituvchi Stark Logistic transport kompaniyasiga qisman egalik qiladi. Kompaniya urush paytida Rossiya ta’minotidan deyarli 1,5 million yevro ishlab topgan. Hukumat rahbari bu haqda bilmaganini aytdi, ammo prezident Alar Karis jamoatchilikka tushuntirish berishni talab qildi. Muxolifat esa bosh vazir iste’fosini talab qilmoqda.

Yangiliklar