Pashinyan: “Xavfsizlik borasida Rossiyaga qaramligimiz strategik xato edi”

Armaniston bosh vaziri Nikol Pashinyan Rossiyani Qorabog‘ aholisi xavfsizligini ta’minlash bo‘yicha o‘z majburiyatlarini bajarmayotganlikda aybladi. Bu haqda Deutsche Welle xabar berdi.

Armaniston, Ozarbayjon va Rossiya o‘rtasida 2020-yilda harbiy harakatlar tugaganidan keyin tuzilgan kelishuvlarga ko‘ra, rossiyalik tinchlikparvar kuchlar Lochin yo‘lagini nazorat qilishi kerak. Ammo Pashinyanga ko‘ra, bu amalga oshmayapti.

“Nega? Ikkita sabab bo‘lishi mumkin: yo Rossiya Lochin yo‘lagi ustidan nazoratni saqlab qola olmaydi yoki xohlamaydi. Har ikkisi ham, biz uchun muammoli”, — dedi u.

Pashinyanning so‘zlariga ko‘ra, Rossiya G‘arb davlatlarini Armaniston hukumatini hududdan “Rossiyani siqib chiqarishga qaratilgan chora-tadbirlarni ko‘rishga” undayotganlikda ayblaydi, lekin aslida “Rossiyaning o‘zi hududni tark etmoqda”.

Armaniston bosh vaziri, “bir kun kelib uyg‘onganimizda, Rossiya bu yerda yo‘qligini ko‘ramiz”, degan fikrni ilgari surdi. Shuningdek, u mamlakatning xavfsizlik sohasida Rossiyaga qaramligini strategik xato deb atadi.

“Armanistonning xavfsizlik arxitekturasi 99,999 foiz Rossiya bilan bog‘liq edi, shu jumladan, qurol va o‘q-dorilarni qo‘lga kiritish borasida. Biroq bugungi kunda, Rossiyaning o‘zi qurol va o‘q-dorilarga muhtoj bo‘lgan bir vaziyatda, Rossiya xohlasa ham, Armanistonning xavfsizlik ehtiyojlarini ta’minlay olmasligi aniq. Ya’ni, bu misol xavfsizlik sohasida faqat bir joyga bog‘liq bo‘lish o‘z-o‘zidan strategik xato ekanini ko‘rsatadi”, — ta’kidladi Pashinyan.

Yangiliklar