Ramzan Qodirovning oʻgʻli Adam Qodirov “Checheniston Qahramoni” boʻldi. Bu haqda Rossiya Davlat dumasi deputati Adam Delimxanov oʻzining Telegram kanali orqali ma'lum qildi.
Sentyabr oxirlarida Adam Qodirov Qur'onni yoqishda ayblanayotgan Nikita Juravelni urgani aks etgan video tarqalgandi. Oʻshanda Checheniston rahbari oʻgʻlining harakatini ma'qullaganini aytgan.
“Qadrdon jiyanimni katta mamnuniyat bilan qutlayman… Adam Ramzanovich Qodirovga Checheniston Rspublikasining oliy mukofoti — ‘Checheniston Qahramoni’ unvoni topshirildi. U yoshligidan liderlik va tashkilotchilik qobiliyatlarini namoyon etib kelmoqda, doim shaxsiy rivojlanish ustida ishlaydi va hech qachon vaqtini behuda sarflamaydi”, — deb yozadi Delimxanov.
“Checheniston Qahramoni” unvoni qahramonlik koʻrsatish bilan bogʻliq mintaqa va respublika xalqi oldidagi ulkan xizmatlari uchun beriladi. Mukofotni olganlar qator imtiyozlarga ham ega.
Adam Qodirovning yutuqlari
Adam 15 yoshda. Delimxanovning soʻzlariga koʻra, kichkina Qodirov hofizi Qur'on hisoblanadi. Bundan tashqari u turli fanlarni yaxshi oʻqiydi, tarixga, til oʻrganish va adabiyotga qiziqadi. Taktik oʻq otish boʻyicha 10-ochiq chempionatda u birinchilikni qoʻlga kiritgan.
Bir necha kun oldin Checheniston rahbari Ramzan Qodirovning qizi Ayshat Qodirova bosh vazirning ijtimoiy blok boʻyicha oʻrinbosari etib tayinlangani toʻgʻrisida xabar berilgandi.
“Zamin” yangiliklarini “Telegram”da kuzatib boring
