Zelenskiy: Ukraina qarshi hujum paytida kerakli natijalarga erisha olmadi

^{Foto: Getty Images}

Ukraina prezidenti Volodimir Zelenskiy yozgi qarshi hujum paytida kutilgan natijalarga erishmaganini aytdi.

«Biz tezroq natijalarga erishmoqchi edik. Shu nuqtai nazardan qaraganda, afsuski, kutilgan natijalarga erisha olmadik. Va bu haqiqat», dedi Zelenskiy.

U Ukraina Qurolli kuchlari «dunyoning ikkinchi armiyasi» bilan kurashayotgan pallada chekinmaganidan xursand ekanini qo‘shimcha qildi.

«Mana, biz chekinmayapmiz, bundan xursandman. Biz dunyodagi ikkinchi armiya bilan jang qilmoqdamiz. Biz odamlarni yo‘qotyapmiz, bundan qoniqmayapman. Biz xohlagan barcha qurollarni olmadik, albatta qoniqmayman. Lekin ortiqcha shikoyat qila olmayman», dedi prezident.

Uning so‘zlariga ko‘ra, Ukraina Qurolli kuchlarining «miqdor jihatdan cheklanganligi» tezkor hujumga imkon bermaydi.

«Istalgan natijalarga tezroq erishish uchun kuch yetarli emas. Ammo bu biz taslim bo‘lishimiz kerak, degani emas. Biz harakatlarimizga ishonchimiz komil. Biz o‘zimizga tegishli bo‘lgan narsa uchun kurashyapmiz», dedi Zelenskiy.

Shuningdek, u Isroil urushi Ukrainaga yordam yetkazib berishni allaqachon kamaytirganini aytdi.

«Buni faqat ko‘r odam ko‘rmaydi. Biz odamlar bu yerdagi urush haqida unutishlariga yo‘l qo‘ymasligimiz kerak», dedi u.

Zelenskiy hozir Ukrainaning ustuvor yo‘nalishi o‘z qurollarini ishlab chiqarish deb hisoblamoqda. Buning uchun G‘arb kreditlari va shartnomalarini olishni xohlamoqda.

«Bu yechim. Bizga bu imkoniyatlarni bering va biz buni quramiz. Qanday kuch va vaqt kerak bo‘lmasin, biz buni qilamiz va biz buni juda tez bajaramiz», dedi prezident.

Uning fikricha, «Rossiyani harbiy jihatdan o‘zini-o‘zi ta’minlaydigan Ukrainadan boshqa hech narsa qo‘rqitmaydi».

Uni Rossiya bilan muzokara olib borishga undayotganlar haqidagi mish-mishlarga izoh berarkan, prezident shunday javob berdi: «Buni hozircha sezmayapman. Ba’zi ovozlar doimo eshitiladi».

Shu bilan birga, uning so‘zlariga ko‘ra, Ukrainadagi urush yangi bosqichga kirdi.

«Biz urushning yangi bosqichidamiz va bu haqiqat. Umuman olganda, qish - urushning yangi bosqichidir», dedi prezident. Bunda Zelenskiy yaqinda «Shohid» dronlarining ommaviy zarbalari va energetika sohasini ham eslab o‘tdi.