Rossiya armiyasi Ukrainaning energetika infratuzilmasini yo‘q qilish uchun navbatdagi qishki kampaniyani boshlagan bo‘lishi mumkin, deb hisoblaydi Britaniya harbiy razvedkasi. Buyuk Britaniya Mudofaa vazirligi tomonidan 10 dekabr, yakshanba kuni X (sobiq Twitter) ijtimoiy tarmog‘ida chop etilgan kundalik hisobotida aytilishicha, gap ikki oydan ortiq tanaffusdan so‘ng strategik samolyotlardan foydalangan holda yangi zarbalar berish haqida ketmoqda.
Hisobot mualliflari ta’kidlaganidek, 7 dekabrga o‘tar kechasi Rossiya Harbiy-havo kuchlari 2023 yil 21 sentyabrdan beri birinchi marta «og‘ir bombardimonchi samolyotlardan foydalangan holda Kiyev va markaziy Ukrainaga kuchli hujumlar amalga oshirdi». Tu-95 ekanligi taxmin qilinayotgan bu samolyotlar Kaspiy dengizi ustida joylashgan hududdan kamida 16 ta qanotli raketalarni uchirdi. Ehtimol, bu X-101 raketalari bo‘lgan (NATO tasnifiga ko‘ra - AS-23a KODIAK).
«Rossiya qishki kampaniyada foydalanish uchun bu raketalarni zaxiralab qo‘ygan. Bu, ehtimol, Ukrainaning energetika infratuzilmasini yo‘q qilishga qaratilgan Rossiya kampaniyasining boshlanishidir», - deyiladi razvedka hisobotida. Shu bilan birga, ta’kidlanishicha, hujumdan ko‘rilgan zarar «minimal», chunki raketalarning aksariyati Ukraina havo mudofaasi tomonidan muvaffaqiyatli tutib olingan.
“Zamin” yangiliklarini “Telegram”da kuzatib boring
