Xitoyda 28 million dollar pora olgan bank rahbari o‘limga hukm qilindi

^{Foto: Google Images}
China Merchant Bank'ning sobiq prezidenti Tian Xueyu Xitoyda o‘lim jazosiga hukm qilindi. U avvalroq poraxo‘rlik va insayd ma’lumotlarni sotishda aybdor deb topilgan edi. Bu haqda Bloomberg Xitoy markaziy televideniyesiga tayanib xabar bermoqda.

Tian Xueyu 2013 yildan beri China Merchant Bank'ni boshqarib keladi. Ilgari u bir qancha banklarda, jumladan, Shanxay Bankida turli lavozimlarda ishlagan. 2022 yil oktyabr oyida u korrupsiyada gumonlanib hibsga olingan va Xitoy Kommunistik partiyasidan chiqarib yuborilgan.

Tergov natijalariga ko‘ra, Tian Xueyu yuqori lavozimlarni egallab turgan vaqtida o‘z mansabidan foydalanib, jismoniy shaxslar va kompaniyalar uchun kreditlar va loyihalarni muvofiqlashtirish, qo‘l ostidagi xodimlar lavozimni ko‘tarish va boshqa xizmatlar evaziga katta miqdorda pora olgan. Xitoy rasmiylariga ko‘ra, bankirning bunday faoliyati XXR milliy manfaatlariga zarar yetkazgan.

Sobiq bankirning o‘zi 2023 yil noyabrida bo‘lib o‘tgan navbatdagi sud majlisida jami 210 million yuandan (28,8 million dollar) ortiq pora olganini tan oldi.

So‘nggi yillarda Xitoy yetakchisi Si Szinpin buyrug‘i bilan korrupsiyaga qarshi kurash doirasida bir qator yuqori martabali moliya sohasi amaldorlari, jumladan, Xitoy CITIC banki prezidenti Sun Deshun va China Life Insurance kompaniyasining sobiq rahbari Van Bin hibsga olindi. Ularning barchasi o‘limga hukm qilingan. “Zamin” yangiliklarini “Telegram”da kuzatib boring