Aleksey Navalniyning jasadi onasiga topshirildi

^{Foto: Moskva shahar sudi}
Rossiyalik muxolifatchi, marhum Aleksey Navalniyning jasadi uning onasi Lyudmila Navalnayaga topshirildi. Bu haqda muxolifatchining matbuot kotibi Kira Yarmish xabar berdi.

“Alekseyning jasadi onasiga topshirildi. Biz bilan birgalikda buni talab qilgan barchaga katta rahmat. Xayr Salexardagi Lyudmila Ivanovna. Dafn marosimi hali oldinda. Oilasi marhumni xohlagan va Alekseyga munosib tarzda dafn qilishiga rasmiylar xalaqit beradimi yoki yo‘qligini bilmaymiz. Ma’lumotlar paydo bo‘lishi bilan xabar beramiz”, — dedi Yarmish.

Aleksey Navalniy o‘limi

Rossiyalik siyosatchi, Putinning ashaddiy tanqidchisi Aleksey Navalniy 16 fevral kuni koloniyada vafot etdi. Rossiya qamoqxona xizmatiga ko‘ra, u “sayrdan keyin o‘zini yomon his qilgan va hushini yo‘qotgan”. O‘limga dastlab tromb yorilgani sabab bo‘lgani aytilgan.

“Ommaviy axborot vositalarida yozilayotgan va Jazoni ijro etish Federal xizmati tomonidan e’lon qilingan xabarda Aleksey Navalniy tromb yorilishidan vafot etgani aytilmoqda. Ammo buni hozircha tasdiqlab bo‘lmaydi, chunki bu kasallikni aniqlash uchun avval murdani yorib ko‘rish kerak”, — degan Navalniyni davolagan shifokor Polupanov.

O‘z navbatida, Tergov qo‘mitasi tergovchilar marhumning jasadi tekshirilishini ma’lum qilgandi. Kira Yarmish va muxolifatchining tarafdorlari o‘shanda Navalniyning jasadini zudlik bilan oilasiga berishni talab qilgandi. “Zamin” yangiliklarini “Telegram”da kuzatib boring