Rossiyada terakt qurbonlari uchun butun mamlakat bo‘ylab motam boshlandi

^{Foto: RIA Novosti}
Rossiyada 24 mart kuni Moskva yaqinidagi Crocus City Hall'dagi teraktda halok bo‘lganlar uchun milliy motam kuni boshlandi - bu mamlakatning zamonaviy tarixida o‘ttizinchi motam kuni bo‘ladi, deya “RIA Novosti” xabar berdi.

24 martni motam kuni deb e’lon qilish qarorini bir kun avval Rossiya prezidenti Vladimir Putin maxsus murojaatida rossiyaliklarga e’lon qilgan edi. U Moskva viloyatida sodir bo‘lgan voqeani qonli, vahshiy terrorchilik harakati deb atagan va jinoyatchilar, tashkilotchilar va buyurtmachilar adolatli va muqarrar jazoga tortilishiga va’da bergan.

"Yaqinlarini yo‘qotganlarga samimiy hamdardlik bildiraman. Siz bilan butun mamlakat motam tutmoqda. 24 martni umumxalq motam kuni deb e’lon qilaman", — dedi Putin.

Moskvaliklar terakt sodir bo‘lgan joyga gullar olib kelishmoqda va Rossiya hududlarida qurbonlar xotirasiga yodgorliklar paydo bo‘lmoqda. Birgina 23 mart kuni poytaxtning to‘rt mingdan ortiq aholisi donorlik markazlariga Crocus City Hall'dagi teraktdan jabrlanganlarga qon topshirish va yordam berish uchun keldi, Rossiyaning bir qancha banklari terakt qurbonlarining kreditlarini hisobdan chiqarish niyatida ekanliklarini e’lon qildi.

22 mart kuni kechqurun Krasnogorskda noma’lum shaxslar Crocus City Hall binosiga bostirib kirib, otishma va o‘t qo‘yishni boshlagan. FXX markaziy razvedka markazi ma’lumotlariga ko‘ra, Crocus’da terrorchilar qo‘llagan qurollar oldindan tayyorlangan. Teraktdan so‘ng jinoyatchilar Rossiya-Ukraina chegarasi tomon harakatlanib, avtomashinada qochishga uringan, ular chegarani kesib o‘tish niyatida bo‘lgan.

Razvedka xizmatlari va huquq-tartibot idoralari xodimlari 11 kishini, jumladan, teraktga bevosita aloqador bo‘lgan to‘rt nafar terrorchini qo‘lga olgan. Bryansk viloyatida bir necha soat ichida to‘rt nafar jangari qo‘lga olingan. Keyinroq Rossiya IIV qo‘lga olinganlarning barchasi xorij fuqarolari ekanligini aytgan.

Rossiya tergov qo‘mitasining so‘ngi hisobotiga ko‘ra, terakt oqibatida halok bo‘lganlar soni 133 nafar, jarohatlanganlar soni esa 152 nafarga yetgan.

Yangiliklar