Ramzan Qodirov Shavkat Mirziyoevga ikkita zotdor ot sovgʻa qildi (video)

^{Foto: Videodan kadr}
Checheniston rahbari Ramzan Qodirov Oʻzbekiston prezidenti Shavkat Mirziyoevga uning tugʻilgan kuni munosabati bilan ikkita zotdor ot sovgʻa qildi. Bu haqda Qodirov oʻzining Telegram kanalida xabar berdi.

"Bugun Grozniyda “Axmat” Osiyo jang ligasi prezidenti Nodir Qodirovga ikkita zotdor otni topshirdim. Bu Oʻzbekiston prezidenti Shavkat Mirziyoevga oʻtgan tugʻilgan kuni munosabati bilan sovgʻa. Uning jonivorlarga boʻlgan muhabbatini bilganim uchun bu sovgʻa unga ma'qul kelishiga ishonaman. Otlar juda yaxshi va yosh boʻlishiga qaramay, turli musobaqalarda oʻzlarini juda muvaffaqiyatli namoyon etgan", deydi Qodirov.

Uning soʻzlariga koʻra, Checheniston va Oʻzbekiston oʻrtasida “yaqin qardoshlik munosabatlari” shakllangan.

"Shubhasiz, bunda shaxsan Shavkat Miromonovichning xizmati katta. Biz ham Checheniston, ham Oʻzbekiston taraqqiyotiga xizmat qiladigan tajriba va bilimlarimizni faol almashib kelmoqdamiz. Oʻzbekiston xalqiga farovonlik, Shavkat Mirziyoevga esa uzoq umr va mamlakatni rivojlantirish boʻyicha rejalarini amalga oshirishda muvaffaqiyatlar tilayman", deya qoʻshimcha qilgan Checheniston rahbari.
“Zamin” yangiliklarini “Telegram”da kuzatib boring