To‘qayev: “Markaziy Osiyo mudofaa sohasida mintaqaviy hamkorlik zarur”

^{Foto: “Inbusiness.kz”}
Markaziy Osiyo atrofida davom etayotgan murakkab xalqaro vaziyat tufayli mudofaa sohasida mintaqaviy hamkorlik zarurati paydo bo‘ldi, deb yozadi Qozog‘iston prezidenti Qosim-Jo‘mart To‘qayev “Kazakstanskaya pravda” gazetasida chop etilgan maqolasida.

“Markaziy Osiyo perimetri bo‘ylab davom etayotgan og‘ir harbiy-siyosiy vaziyat fonida mudofaa siyosati va xavfsizlik sohasida hamkorlik zarur”, deydi u.

Uning so‘zlariga ko‘ra, mintaqada xavfsizlik arxitekturasini yaratish, jumladan, Markaziy Osiyo uchun “xavfsizlik xatarlari katalogi”ni ishlab chiqish va ularning oldini olish choralari ayniqsa dolzarb bo‘lib bormoqda.

To‘qayevning fikricha, Markaziy Osiyo davlatlarining asosiy ustuvor yo‘nalishlari “bo‘linmas xavfsizlik makonini shakllantirish”, tahdidlarga qarshi kurashning asosiy masalalarini hal qilishda kompleks yondashuvlarni izlash, javob choralari va oldini olish choralarini ishlab chiqishdir.

Qozog‘iston yetakchisi mudofaa sohasida BMT va boshqa xalqaro hamda mintaqaviy tashkilotlar bilan faol hamkorlik qilish ham muhim ekanini qayd etgan.

To‘qayev, shuningdek, o‘z maqolasida mintaqaviy hamkorlikning boshqa vazifalariga ham alohida to‘xtalib o‘tgan. Xususan, iqtisodiy salohiyatni yanada rivojlantirish, resurslarga qaramlikdan chiqish, Markaziy Osiyoni transport-logistika va tranzit habga aylantirish, suv, energetika va oziq-ovqat xavfsizligini ta’minlash bo‘yicha umumiy yondashuvlarni ishlab chiqish, yoshlar o‘rtasidagi aloqalarni mustahkamlash, shuningdek, sivilizatsiyaviy o‘ziga xoslikni shakllantirish uchun qo‘shma platformalar yaratish, yosh avlod salohiyatini rivojlantirish shular jumlasidandir. “Zamin” yangiliklarini “Facebook”da kuzatib boring