Germaniya Telegram'ni yetarlicha hamkorlik qilmaganlikda aybladi

^{Foto: AP / Andy Wong}
Konstitutsiyani himoya qilish federal idorasi (BfV) rahbari o‘rinbosari Zinan Zelen Telegram platformasini hamkorlikka tayyor emaslikda aybladi. Zelen tegishli pozitsiyani 28 avgust, chorshanba kuni Berlinda bildirdi.

Uning so‘zlariga ko‘ra, turli doiralar Pavel Durov platformasida muloqot qiladi va idora «diqqat markazida» bo‘ladi. Shu bilan birga, terrorizm yoki o‘ng ekstremizmga qarshi kurashish haqida gap ketganda, «boshqa platformalardagi kabi ma’lumotlar almashinuvi (Telegram tomonidan) yo‘q», deb ta’kidlaydi Zelen.

«Biz Telegram'ga savollar ham beryapmiz» va «javoblar - cheklangan», deya uning so‘zlarini keltiradi AFP. «Qonunan ruxsat etilgan» so‘rovlar doirasida axborotni juda tez va ishonchli taqdim etuvchi platformalar mavjud, biroq Telegram ulardan biri emas, deya qo‘shimcha qildi Zelen.

Nemis kompaniyalariga tahdidlar kuchaymoqda

Germaniya Ichki ishlar vazirligi razvedka xizmati boshlig‘i o‘rinbosari, shuningdek, Germaniyada Rossiya Federatsiyasining Ukrainaga qarshi urushi boshlanganidan beri onlayn-diversiya, internetda razvedka kampaniyalari va raqamli kuzatuvlar ko‘payganini ta’kidladi - nafaqat harbiylar, balki siyosiy partiyalar va nemis kompaniyalari bo‘yicha ham. BfV hamda Bitkom soha assotsiatsiyasi tomonidan taqdim etilgan yangi Wirtschaftsschutz 2024 hisoboti shuni ko‘rsatadiki, Germaniyadagi o‘nta kompaniyadan yettitasi kuchli tahdidni his qiladi, analog va raqamli hujumlar qurboni bo‘lish ehtimolini inkor etmaydi, deb yozadi WirtschaftsWoche iqtisodiy gazetasi.

Xalqaro mojarolar va tizimli raqobat iqtisodiyotdagi xavfsizlik holatiga tobora ta’sir o‘tkazmoqda. «Kiberjosuslik va kiberjinoyat o‘rtasidagi aloqalar kuchayishda davom etmoqda», - deya ta’kidladi ekspert hisobotni taqdim etar ekan. «Bundan tashqari, biz raqamli va analog hujumlar o‘rtasida yanada yaqinroq aloqani ko‘rmoqdamiz», dedi u.

2023 yil sentyabr oyida Bitkom IT-birlashmasi Germaniya iqtisodiyoti ma’lumotlar o‘g‘irlanishidan 200 milliard yevrodan ko‘proq zarar ko‘rgani haqida xabar berdi. Aksariyat kiberhujumlar Rossiya va Xitoy manfaatlaridan kelib chiqqan holda hakerlar tomonidan amalga oshirilgan.

YEI Telegram foydalanuvchilar soni kamaytirib ko‘rsatgani ehtimolini tekshirmoqda

Yevrokomissiyaning fan va axborot xizmati - Qo‘shma tadqiqot markazi Telegram messenjeri rahbariyati Yevropa tartib-qoidalariga tushib qolmaslik uchun Yevropa Ittifoqidagi o‘z foydalanuvchilari sonini kam ko‘rsatishi ehtimolini tekshirmoqda. Bu haqda 28 avgust kuni Financial Times nashri xabar berdi.

Fevral oyida Telegram Yevropa Ittifoqida 41 million oylik foydalanuvchiga ega ekanligini ma’lum qilgandi. Yevropa Ittifoqi qonunlariga ko‘ra, messenjer avgust oyida yangilangan ma’lumotlarni taqdim etishi kerak, biroq buni qilmadi va Yevropa Ittifoqidagi oylik auditoriyasi «45 milliondan sezilarli darajada kam» degan bayonot bilan cheklandi. Biroq, Bryussel bunday emas deb gumon qilmoqda va tekshiruv belgilangan chegaradan oshib ketganligini ko‘rsatishi mumkin.

Fevral oyida kuchga kirgan yangi Yevropa Ittifoqining raqamli xizmatlar to‘g‘risidagi qonuniga (Digital Services Act, DSA) ko‘ra, Yevropa Ittifoqida oylik 45 milliondan ortiq foydalanuvchisi bo‘lgan onlayn platformalar va ijtimoiy tarmoqlar, birinchi navbatda, foydalanuvchilar uchun xavfli bo‘lgan noqonuniy kontentni moderatsiya qilishi kerak, shuningdek, so‘rov bo‘yicha Yevropa komissiyasiga o‘z ma’lumotlarini taqdim etishga majbur. Mutaxassislarning taxminicha, Telegram rahbariyati ushbu qoidalarga tushib qolmaslik uchun Yevropa Ittifoqidagi foydalanuvchilari sonini ataylab kam ko‘rsatgan, deb yozadi Financial Times. “Zamin” yangiliklarini “Facebook”da kuzatib boring