Telegram Janubiy Koreya rasmiylarining talabiga binoan pornografik deepfake'larni o‘chirdi

^{Foto: Unsplash}
Telegram Janubiy Koreya rasmiylaridan uzr so‘radi va shahvoniy mazmundagi deepfake'larni (sun’iy intellektga asoslangan tasvir sintezi texnikasi) olib tashlash talablarini bajardi. Bu haqda Yonhap axborot agentligi xabar berdi.

Telegram'ning Sharqiy Osiyodagi sho‘ba korxonasi vakili Koreya aloqa standartlari komissiyasiga (KCSC) elektron xat yuborgan va kompaniya KCSC so‘roviga ko‘ra o‘z platformasidan 25 dona shahvoniy materiallarni olib tashlaganini tasdiqlagan.

“Biz soxta jinsiy ekspluatatsiya kontentining tarqalishi muammosini hal qilish va natijada raqamli jinsiy kontentni yo‘q qilish uchun ishonch telefonini tashkil etish orqali Telegram bilan hamkorlikni kuchaytirmoqchimiz”, dedi KCSC.

Telegram, shuningdek, ushbu masala bo‘yicha tushunmovchilik uchun uzr so‘ragan va kelgusida nazorat organi bilan bog‘lanish uchun elektron pochtasini taqdim etgan.

Janubiy Koreyada Telegram kompaniyasi o‘smirlar suratlari asosida sun’iy intellekt tomonidan yaratilgan pornografik soxta ma’lumotlarni tarqatish bilan bog‘liq jinsiy jinoyatlarni sodir etishda sheriklikda gumon qilinayotgani xabar berilgandi.

Mamlakat politsiyasi ma’lumotlariga ko‘ra, 26 avgustdan 29 avgustgacha bo‘lgan vaqt oralig‘ida deepfake'lar bilan bog‘liq jinsiy huquqbuzarliklarga aloqador 88 ta xabar ro‘yxatga olingan. Tekshiruvlar natijasida 24 nafar gumondor shaxs aniqlangan. “Zamin” yangiliklarini “Odnoklassniki”da kuzatib boring