Xitoy Markaziy banki raisining sobiq oʻrinbosari 55 mln dollar pora uchun oʻlimga hukm qilindi

^{Foto: Reuters}
Xitoyning markaziy Hubey viloyatidagi Huangan shahri sudi Xitoy Xalq banki (Markaziy bank) sobiq rais oʻrinbosari Fan Ifeyni 386 million yuan (qariyb 55 million dollar) miqdorida pora olgani uchun ikki yil kechiktirish bilan oʻlim jazosiga hukm qildi. Bu haqda Reuters xabar berdi.

Ayblanuvchi barcha siyosiy huquqlaridan umrbod mahrum qilinadi. 60 yoshli Fan Ifeyning butun shaxsiy mol-mulki musodara etiladi. Agar ikki yildan soʻng oʻlim hukmi umrbod qamoq jazosiga almashtirilsa, uning ishi boʻyicha, keyinchalik jazoni engillashtirish yoki muddatidan oldin ozod qilish imkoniyati boʻlmaydi.

Sud Fan Ifeyni “oʻta ogʻir vaziyatlar bilan bogʻliq va jiddiy ijtimoiy oqibatlarga olib kelgan jinoyat sodir etgan” deb tan oldi. Xususan, Markaziy bank raisining sobiq oʻrinbosari “xalq manfaatlariga katta zarar etkazgan”. OAV xabar berishicha, ayblanuvchi oʻz aybini tan olib, qilmishidan chuqur pushaymon boʻlgan, shuningdek, “oʻzlashtirilgan mablagʻlarni faol qaytarishga harakat qilgan”.

Fan 2022 yil oxirida Xitoy hukumati tomonidan tergovga tortilgandi, 2023 yilda esa Kommunistik partiyadan chiqarildi.

Soʻnggi oylarda Xitoyning korruptsiyaga qarshi nazorat idorasi moliya sektoriga nisbatan keng koʻlamli qattiq choralar koʻra boshladi. Bu mamlakatning eng nufuzli shaxslarini, jumladan, davlat mulkidagi Xitoy bankining sobiq raisi Lyu Lyanj va Xitoy hayot sugʻurtasi kompaniyasi sobiq boshqaruvchisi Van Binni ham oʻz domiga tortdi.

2023 yil mart oyida lavozimidan ketgan Lyu 121 million yuandan ortiq pora olganlikda aybdor deb topildi.

China Everbright Group sobiq raisi Tang Shuangning ham poraxoʻrlik va korruptsiyada ayblandi. “Zamin” yangiliklarini “Telegram”da kuzatib boring