Isroil Gʻazo sektori shimolidagi harbiy harakatlarini davom ettirmoqda

^{Foto: Reuters}
Reuters xabariga koʻra, isroillik harbiylar amalda anklav shimolidagi Bayt-Xanun, Jabaliya va Bayt-Lahiyani Gʻazo shahridan ihotalagan, hududlar orasidagi qatnovlar toʻxtatilgan. Faqat Isroilning evakuatsiya boʻyicha buyrugʻiga boʻysunib, ushbu shaharlarni tark etishga tayyor boʻlganlarga istisno qilinadi.

Isroil Gʻazo shimolida keng koʻlamli amaliyotni qaytadan boshlaganidan toʻqqiz kun oʻtib, Gʻazo hukumati matbuot xizmati Isroil zarbalaridan 300 ga yaqin falastinlik halok boʻlganini ma'lum qildi. Hamas Isroil fuqarolik ob'ektlari va boshpanalarni aholini Gʻazoni butunlay tark etishga majbur qilish maqsadida bombardimon qilayotganini aytadi. Isroil esa buni rad etadi.

Gʻazo sogʻliqni saqlash vazirligi ma'lumotiga koʻra, anklavning shimoliy hududlari boʻylab zarbalar oqibatida oʻnlab kishilar halok boʻlgan, shuningdek, shifoxonaga olib ketish chogʻida va tibbiyot xodimlari etib bora olmagani tufayli xarobalar ostida ham koʻplab yaradorlar jon bergan.

Gʻazoning 2,3 milliondan ortiq aholisining yarmidan ortigʻi yashaydigan shimoliy qismi Isroilning bir yil oldin boshlangan yurishi natijasida amalda xarobaga aylangandi.

Isroilning 42 ming falastinlik oʻlimiga olib kelgan amaliyotining bir yilidan keyin yuz minglab kishilar shimolga qaytishgandi. Bir hafta muqaddam Isroil Hamas jangchilarini yoʻq qilish uchun yana mazkur hududga qoʻshin yubordi, isroilliklar fikricha, falastinliklar yangi hujumlar uchun qayta guruhlangan. Hamas oʻz a'zolari tinch aholi vakillari orasida harakatlanayotganini rad etadi.

Gʻazo shimolidagi eskalatsiya SAHAL Livan janubida «Hizbolloh»ga qarshi boshlagan keng koʻlamli havo va quruqlik amaliyotlari bilan bir vaqtda yuzaga keldi.

Isroilning Gʻazodagi amaliyotining asosiy yoʻnalishi anklavning shimoliy qismiga qaratilgan boʻlsa-da, isroillik harbiylar sektorning boshqa hududlari boʻylab ham zarbalar bermoqda. Gʻazo sogʻliqni saqlash vazirligiga koʻra, yakshanba kuni tongida isroilliklar zarbasi oqibatida kamida 11 kishi halok boʻlgan, shundan olti nafari Gʻazo shahridan janubda, sektor markaziy qismidagi «Bureyj» qochqinlar lageriga yoʻllangan zarba oqibatida.

Isroillik harbiylar yakshanba kuni Gʻazo sektori boʻylab harakatlanayotgan kuchlari soʻnggi 24 soat mobaynida 40 ga yaqin nishonga zarba yoʻllab, oʻnlab jangarilarni oʻldirgani haqida bayonot bergan.

«162-diviziya kuchlari Jabaliya hududida harakatlanishda davom etmoqda, soʻnggi bir kun davomida oʻnlab terrorchilar oʻldirildi va hududda portlovchi qurilmalar, qurollar, granatalar va boshqa urush olib borish vositalari topildi», — deyilgan SAHAL bayonotida.

Hamasning qurollangan boʻlinmalari, «Islom jihodi» va boshqa kichik guruhlar oʻz jangchilari Jabaliyada va atrofdagi hududlarda Isroil qoʻshinlariga tanklarga qarshi raketalar hamda minomyot zarbalari bilan hujumlar uyushtirgani haqida xabar qilgan.

Falastinlik mulozimlar hamda Birlashgan Millatlar Tashkiloti vakillari Gʻazoda xavfsiz joy qolmaganini aytib kelishadi. Ular shuningdek Gʻazo shimolida oziq-ovqat, yonilgʻi hamda dori-darmonlarning oʻtkir taqchilligi boshlanishi, bu erda ochlik xavfi mavjudligidan xavotir bildirishadi. “Zamin” yangiliklarini “Telegram”da kuzatib boring