Qirgʻiziston prezidenti qabristonda yodgorlik oʻrnatishni taqiqlashni tavsiya qildi

^{Foto: Kloop.kg}
Qirgʻiziston prezidenti Sadir Japarov «Dafn etish va dafn ishlari toʻgʻrisida»gi qonunni amalga oshirish chora-tadbirlari toʻgʻrisidagi farmonni imzoladi. Bu haqda davlat rahbari matbuot xizmati xabar berdi.

Farmonda Qirgʻiziston musulmonlari diniy boshqarmasiga (QMDB) qabristonlar hududida yodgorliklar, haykallar, qabr toshlari, tosh, granit, marmar, metalldan yasalgan panjaralarni oʻrnatishni taqiqlovchi fatvo chiqarish tavsiya etilgan. Tarixiy va madaniy ahamiyatga ega boʻlgan dafnlar uchun istisno boʻlishi mumkin.

«Musulmonga shariatga koʻra, qabrga qimmatbaho tosh turlarini oʻrnatish va qabr ustiga surat qoʻyish, uni temir panjaralar bilan oʻrash, tsement va betondan foydalanish taqiqlangan. Bunday odatlar marhumga yordam bermaydi», degan edi Japarov shu yil iyul oyida «Kabar» axborot agentligiga bergan intervyusida.

Prezident oʻz yurtdoshlarini qabristonlarga metall va tosh yodgorliklar oʻrnatishni toʻxtatishga chaqirdi.

«Ba'zi siyosatchilarning nima deyishi menga qiziq emas. Marhumlarning xotirasini hurmat qilish uchun har kuni uyda Qur'on oʻqish yoki uzoqda boʻlsangiz ham ularni duo qilish mumkin. Shu etarli. Shunda marhum shod boʻladi. Metall yodgorliklar yoki ikki qavatli maqbaralar oʻrnatish bizning an'anamiz emas», dedi Qirgʻiziston rahbari.

Qarorga koʻra, qabr yodgorliklari va panjaralar yogʻoch materiallardan yasalgan boʻlishi va balandligi 0,7 metrdan oshmasligi kerak. Bunday chora-tadbirlar qabr yodgorliklarini qurishda isrofgarchilikning oldini olishga yordam beradi, deb hisoblaydi prezident.

Musulmonlar diniy boshqarmasi va boshqa tegishli idoralarga marhumlarni dafn etish masalalari boʻyicha aholi oʻrtasida doimiy targʻibot-tushuntirish ishlarini olib borish topshirildi.

Arxitektura, qurilish va uy-joy kommunal xizmat koʻrsatish davlat agentligiga uch oy muddatda qabristonlarni obodonlashtirish, saqlash, qabr yodgorliklarining oʻlchamlari, ularni tayyorlash va oʻrnatish uchun materiallarga qoʻyiladigan talablar boʻyicha loyihaviy yoʻriqnomalar ishlab chiqish vazifasi yuklatildi. “Zamin” yangiliklarini “Telegram”da kuzatib boring