Tojikistonlik muxoliflar Gʻarb davlatlarini Emomali Rahmonga bosim oʻtkazishga chaqirdi

^{Foto: “AzdaTV”}
Amsterdamda 2018 yilda tojik muxolifatchilari tomonidan tuzilgan “Tojikiston islohotlari va taraqqiyoti” harakati AQSh, Kanada, Buyuk Britaniya, Norvegiya va Evropa ittifoqi hukumatlariga Tojikistonda “inson huquqlarini himoya qilish va demokratik jarayonlarni qoʻllab-quvvatlash boʻyicha harakatlarni muvofiqlashtirish”, shuningdek, respublika rahbariyatiga siyosiy bosimni kuchaytirish chaqirigʻi bilan murojaat qildi.

Murojaat mualliflari Tojikiston prezidenti Emomali Rahmonni muxolifatni ta'qib qilish, inson huquqlarini poymol etish va “demokratik oʻzgarishlar”ga toʻsqinlik qilishda ayblagan. Harakat bayonotida ta'kidlanishicha, “inqirozni muloqot orqali hal qilishning tinch yoʻllari amalda tugab boʻlgan”.

“Bu mintaqaviy barqarorlikka jiddiy xavf tugʻdiradi va oldindan aytib boʻlmaydigan beqarorlikka olib kelishi mumkin. Tojikiston yosh aholiga ega davlat boʻlib, fuqarolarining 71 foizini yoshlar tashkil etadi. Bu avlod uchun demokratik muqobil va imkoniyatlarning yoʻqligi radikallashuv xavfini keltirib chiqaradi. Demokratik tanlov boʻshligʻidan ekstremistik guruhlar foydalanishi mumkin, bu nafaqat Tojikistonga, balki butun Markaziy Osiyoga tahdid solmoqda”, deya ogohlantirdi muxolifat.

Qayd etilishicha, mazkur harakat rahbari Sharofiddin Gadoev ismli shaxs mamlakatda hokimiyatni zoʻravonlik bilan egallashga tayyorgarlik koʻrish boʻyicha jinoyatlarda tilga olingan, uning doirasida iyun oyida Tojikiston huquq-tartibot idoralari bir qator siyosatchilar va amaldorlarni qoʻlga olgan.

Avvalroq Tojikiston IIV Niderlandiya hukumatini qidiruvdagi shaxslarni Dushanbega ekstraditsiya qilishga chaqirgan edi. Shundan soʻng Gadoev Niderlandiya uni va boshqa muxolifat faollarini Tojikistonga ekstraditsiya qilmasligiga ishonch bildirgan. “Zamin” yangiliklarini “Telegram”da kuzatib boring