Moldovaning amaldagi prezidenti saylovning birinchi turida g‘alaba qozondi

^{Foto: Reuters}
Moldovaning Yevropani qo‘llab-quvvatlovchi amaldagi prezidenti Mayya Sandu prezidentlik saylovlarining birinchi turida o‘zining asosiy raqibi, mamlakat sobiq bosh prokurori Aleksandr Stoyanogloni ortda qoldirdi. Bu haqda Deutsche Welle xabar berdi.

Dastlabki ma’lumotlarga ko‘ra, Sandu 41 foiz, Stoyanoglo 26 foiz ovoz olgan. Bu Markaziy saylov komissiyasining 96 foizdan ortiq ovozlarni sanab chiqqan ma’lumotlarga asoslanadi.

Prezidentlik poygasining natijasi ikki haftadan keyin saylovlarning ikkinchi turida hal qilinadi. Birinchi turda hech bir nomzod 50 foizdan ortiq ovoz olmagan. Saylovning birinchi bosqichida 11 nafar nomzod ishtirok etgandi.

Referendum natijalari

Prezidentlik saylovlari kuni Moldovaning Yevropa Ittifoqiga qo‘shilishi bo‘yicha ham referendum bo‘lib o‘tdi.

Saylovchilarning 54 foizdan ortig‘i Yevropa integratsiyasiga qarshi ovoz bergan. Ovozlarning 97,43 foizi hisoblab chiqilgan. Saylov va referendumda ishtirok etganlarning umumiy soni 51 foizdan oshib, bir yarim milliondan ortiq fuqaroni tashkil etgan.

"Moldovada erkinlik va demokratiyaga misli ko‘rilmagan hujum yuz berdi", deya referendumning dastlabki natijalarini sharhladi Mayya Sandu.

U “milliy manfaatlarga qarshi bo‘lgan chet el kuchlari bilan hamkorlikda ish yuritayotgan jinoyatchi guruhlar”ni aralashuvda aybladi va ularning maqsadi “demokratik jarayonni izdan chiqarish” ekanini aytdi. “Zamin” yangiliklarini “Facebook”da kuzatib boring