Kiev ittifoqchilari KXDR harbiylari Rossiyada ekani haqidagi xabarlarga qanday baho berdi?

^{Foto: Ng Han Guan/AP}
Pentagon hozircha Janubiy Koreya razvedkasining Shimoliy Koreya qoʻshinlari Ukrainada joylashtirilishi uchun Rossiyaga oʻtkazilgani haqidagi xabarlarini tasdiqlay olmaydi. 19 oktyabr, shanba kuni AQSh mudofaa vaziri Lloyd Ostinning soʻzlarini Reuters agentligi keltirdi.

Shu bilan birga, Ostinning qoʻshimcha qilishicha, agar tasdiqlansa, bu qadam Vashingtonda xavotir uygʻotadi.

Berlin: Soʻnggi xabarlarni katta tashvish bilan kuzatmoqdamiz

Berlin Rossiya va Shimoliy Koreya oʻrtasida, masalan, qurol-yarogʻ yetkazib berish boʻyicha tobora yaqinroq harbiy hamkorlik kuzatilayotganini ta'kidladi. 19 oktyabr kuni Germaniya Tashqi ishlar vazirligi vakili Reuters agentligiga: «Bu jiddiy tashvish uygʻotadi» dedi.

Shimoliy Koreya qoʻshinlarining Rossiya Federatsiyasiga yuborilishi haqidagi xabarlarni izohlar ekan, u shunday dedi: «Biz bu boradagi soʻnggi xabarlarni ham katta tashvish bilan kuzatib boramiz».

Frantsiya: Bu qadam mojaroni yangi bosqichga olib chiqadi

Shimoliy Koreya muntazam qoʻshinlarining Rossiya Federatsiyasini qoʻllab-quvvatlashga jalb etilishi urushning jiddiy avj olishi boʻladi, dedi Frantsiya tashqi ishlar vaziri Jan-Noel Barro va uning ukrainalik hamkasbi Andrey Sibiga 19 oktyabr kuni Kievda oʻtkazilgan qoʻshma matbuot anjumanida.

«Bu jiddiy (qadam) va mojaroni yangi bosqichga, qoʻshimcha avj olish bosqichiga olib chiqadi», dedi Barro Kievga bu lavozimdagi birinchi tashrifi chogʻida. U bu holat Moskva urushda qiyinchiliklarni boshdan kechirayotgani haqida signal boʻlishini qoʻshimcha qildi.

Pentagon KXDR qoʻshinlari Ukrainaga ehtimoliy yuborilishi haqidagi xabarlarni tahlil qilyapti

AQSh Mudofaa vazirligi (Pentagon) paydo boʻlgan xabarlar asosida Rossiyani qoʻllab-quvvatlash uchun Ukrainaga Shimoliy Koreya harbiy kontingenti ehtimoliy yuborilishi imkoniyatini oʻrganmoqda. Bu haqda Pentagon matbuot kotibi brigada generali Patrik Rayder kundalik brifingda aytdi.

Rayderning ta'kidlashicha, Pentagon Pxenyanning Ukrainaga qoʻshin yuborishi mumkinligi haqidagi xabarlarni koʻrgan, ammo ularning haqiqiyligini hali tasdiqlay olmagan.

Uning soʻzlariga koʻra, Pentagon bu masalani oʻrganmoqda va bu yoʻnalishdagi vaziyatni diqqat bilan kuzatishda davom etmoqda.

«Agar bu ayblovlar rost boʻlib chiqsa, bu Rossiya va Shimoliy Koreya oʻrtasidagi hamkorlik kuchayib borayotganini anglatadi. Bu, shuningdek, Rossiyaning jang maydonidagi kuch nuqtayi nazaridan qanchalik ogʻir ahvolda ekanini koʻrsatadi», — dedi u.

Avvalroq Ukraina prezidenti Volodimir Zelenskiy Bryusselda Evropa Ittifoqi (EI) yetakchilari bilan uchrashuv yakunlari boʻyicha jurnalistlarga Rossiya 10 mingga yaqin Shimoliy Koreya askarini janglarga jalb etishni rejalashtirayotganini aytgandi. “Zamin”ni Telegramʻda oʻqing!