Pentagon Shimoliy Koreya qoʻshinlari Rossiyaga yuborilganini tasdiqladi

^{Foto: “ruvr.ru”}
AQSh rasmiylarida Shimoliy Koreya qoʻshinlari Rossiyada ekanini isbotlovchi dalillar mavjud. Bu haqda AQSh mudofaa vaziri Lloyd Ostinga tayanib Reuters xabar berdi.

“Shimoliy Koreya qoʻshinlari Rossiyada ekani haqida dalillar mavjud. Ular aynan nima qilmoqda? Biz faqat taxmin qilishimiz mumkin”, dedi Ostin.

Janubiy Koreya parlamenti razvedka qoʻmitasiga koʻra, Shimoliy Koreyada qoʻshinlarni tayyorlash alomatlari sentyabr va oktyabr oylarida aniqlangan. Qayd etilishicha, askarlar uchun koʻp sonli tarjimonlar yollangan. Ularga zamonaviy urush haqida tushunchaga ega emasligi sababli dronlardan qanday foydalanish oʻrgatilmoqda.

“Urush uchun saralangan askarlarning oilalari shunchalik yigʻlaganki, yuzlari qattiq shikastlangan. Shimoliy Koreya rasmiylari bu oilalarni nazorat qilish va mish-mishlarga chek qoʻyish uchun boshqa joyga koʻchirgani yoki yakkalab qoʻygani haqida ma'lumotlar bor”, deydi janubiy koreyalik rasmiy.

Avvalroq Ukraina va Janubiy Koreya razvedka xizmatlari Shimoliy Koreya Ukrainaga qarshi urushda qatnashish uchun askarlarini yuborgani haqida xabar bergan edi. Ukraina tomoni goʻyoki Primorsk oʻlkasining Sergeevka shahridagi poligonda Shimoliy Koreya askarlarini koʻrsatuvchi videolarni e'lon qilgan.

Shuningdek, KXDR Rossiyaga nafaqat piyoda, balki harbiy uchuvchilarni ham joʻnatgani ma'lum boʻldi. Janubiy Koreya oʻz navbatida KXDR harbiylarini kuzatish va mahbuslarni soʻroq qilishda ishtirok etish uchun oʻz razvedka xodimlarini Ukrainaga oʻtkazish, shuningdek, Kievni qurol-yarogʻ bilan qoʻllab-quvvatlash imkoniyatlarini muhokama qilmoqda. “Zamin” yangiliklarini “Telegram”da kuzatib boring