Ukrainaga dronlar uchun 800 mln dollar ajratilishi AQSH taktikasi o‘zgarganini ko‘rsatadi

^{Foto: FreeDom}
AQSHning Kiyevga uzoq masofaga uchuvchi dronlar ishlab chiqarish uchun 800 million dollar ajratish haqidagi qarori Vashingtonning Ukrainadagi taktikasi o‘zgarganidan dalolat beradi. Bu haqdagi ma’lumotlar The New York Times (NYT) nashrida e’lon qilingan maqolada qayd etilgan.

Unga ko‘ra, Kiyevga dronlar ishlab chiqarish uchun 800 million dollar ajratish to‘g‘risidagi qaror Pentagonning ismini oshkor etmagan vakili tomonidan tasdiqlangan. Bu Ukrainaga nisbatan “G‘arb taktikasi o‘zgarganidan dalolat beradi”. Vashingtonning yangi strategiyasi Ukraina Qurolli kuchlarining o‘z qurollari bilan jangovar operatsiyalarni o‘tkazish qobiliyatini kuchaytirishga qaratilgan, deya ta’kidlaydi nashr.

Qayd etilishicha, Ukrainada dron ishlab chiqarishni qo‘llab-quvvatlash “Zelenskiy uchun o‘ziga xos yupatish harakati bo‘lishi mumkin”. Chunki AQSH G‘arbdagi hamkorlarini Rossiya hududiga zarba berish uchun Ukrainaga ruxsat berishga ko‘ndira olmagan.

NYT'ning ta’kidlashicha, so‘nggi paytlarda Qo‘shma Shtatlardan Kiyevga harbiy yordam ko‘rsatish hajmi “Pentagon zaxiralarining qisqarishi haqidagi xavotirlar tufayli” kamaygan.

21 oktyabr kuni Ukraina prezidenti Vladimir Zelenskiy Kiyev Vashingtondan taxminan 1,6 milliard dollarlik yangi harbiy yordam paketlarini kutayotganini va uzoq masofali qurollar ishlab chiqarish uchun yil oxirigacha yana 8 milliard dollar olishga umid bog‘laganini aytdi.

O‘sha kuni AQSH Mudofaa vaziri Lloyd Ostin Kiyevga tashrifi chog‘ida Ukrainaga 400 million dollarlik qurol-yarog‘ yetkazib berish bo‘yicha navbatdagi yordamni e’lon qildi. Rossiya Federatsiyasining Ukrainadagi harbiy harakatlari boshlanganidan beri Vashington Kiyevga jami 59 milliard dollardan ortiq miqdorda harbiy yordam ajratdi. “Zamin” yangiliklarini “Odnoklassniki”da kuzatib boring