Vengriya hukumati Ukrainaga noqonuniy qurol yetkazib berishning oldini olganini ma’lum qildi

^{Foto: RBC}
Vengriya bosh vaziri devoni rahbari Gergey Guyash mamlakat harbiy sanoatidan Ukrainaga qurol yetkazib berishda foydalanishga urinishlar haqida ma’lum qildi. Uning so‘zlariga ko‘ra, Vengriya razvedkasi yetkazib berishning oldini olgan.

Hukumat brifingida jurnalistlar Guyashdan xorijiy razvedka xizmatlari Ukraina va Afrikadagi jangovar zonalarga Vengriyada ishlab chiqarilgan harbiy texnika yetkazib berishga urinayotgani haqidagi ma’lumotlarga izoh berishni so‘rashdi.

Ma’muriyat rahbari ma’lumotlarni tasdiqlab, Vengriya razvedkasi tomonidan bu urinishlarning oldi olinganini aytdi.

“Faqat shuni aytishim mumkinki, Vengriya hukumatining pozitsiyasi o‘zgarmadi. Biz Ukrainaga qurol va harbiy texnika yetkazib bermaymiz”, dedi Gergey Guyash brifingda.

Avvalroq Vengriya razvedka xizmatlari mamlakatda ishlab chiqarilgan qurollarni Ukrainaga yetkazib berilishining oldini olishga urinishayotgani xabar qilingandi.

Ma’lumotlarga ko‘ra, Vengriyadagi ko‘plab qurol-yarog‘ ishlab chiqaruvchi kompaniyalar xorijiy davlatlarga tegishli bo‘lgani sabab bu ishni amalga oshirish qiyinlashmoqda. Ayrim korxonalar reeksport litsenziyasini chetlab o‘tishga muvaffaq bo‘lgan. “Zamin” yangiliklarini “Instagram”da kuzatib boring