Qirg‘izistonda kriptobanklar ochiladi

^{Illyustartiv foto: ChatGPT}
Qirg‘iziston Iqtisodiyot va tijorat vazirligi “Virtual aktivlar masalalari bo‘yicha ayrim qonun hujjatlariga o‘zgartishlar kiritish to‘g‘risida”gi qonun loyihasini tayyorladi. Bu haqda 24.kg xabar berdi.

Hujjat “Qirg‘izistonda tadbirkorlik faoliyati sifatida litsenziya asosida virtual aktivlar bilan bog‘liq bir yoki bir nechta bank xizmatlarini ko‘rsatuvchi kriptobanklarni joriy etish maqsadida” ishlab chiqilgan. Litsenziya olgach, kriptobank qonunda nazarda tutilgan raqamli aktivlar bilan bog‘liq har qanday faoliyat turlarini amalga oshiradi.

Raqamli texnologiyalar va kriptovalyutalarning jadal rivojlanishini inobatga olgan holda, kriptobank tashkil etish mamlakatning an’anaviy moliya tizimiga kripto-aktivlarni integratsiya qilish uchun dolzarb zaruratdir. Kriptobank fuqarolar va tadbirkorlarning kriptovalyutalar bilan xavfsiz, tartibga solingan va qulay munosabatda bo‘lishini ta’minlaydi, deyiladi asoslovchi ma’lumotnomada.
Kriptobankni joriy etish zarurati quyidagi maqsad va vazifalarni o‘z ichiga oladi:

• Kriptovalyutalar bilan operatsiyalarda huquqiy asosni shakllantirish;
  
• Ma’lumotlar va tranzaksiyalarni himoya qilish uchun zamonaviy texnologiyalarni joriy qilish orqali foydalanuvchilar xavfsizligini ta’minlash;
  
• Moliya sektorida innovatsiyalarni rag‘batlantirish va yangi biznes modellarning rivojlanishi;
  
• Kriptoaktivlar bilan operatsiyalarni qonuniylashtirish orqali soliqlardan tushumlarni oshirish;
  
• Respublika iqtisodiyotiga xorijiy investitsiyani jalb qilish.
  

Iqtisodiyot vazirligining ta’kidlashicha, so‘nggi yillarda jismoniy va yuridik shaxslar o‘rtasida kriptovalyutalarga qiziqish sezilarli darajada oshgan. Kriptobankning tashkil etilishi ushbu bozorni tartibga solish va qonuniylashtirish imkonini beradi. “Zamin” yangiliklarini “Instagram”da kuzatib boring