Yaponiyada Toyota'ning birinchi uchar taksisi namoyish etildi

^{Foto: AP}
Yaponiyaning Toyota Motor Corporation avtomobil korporatsiyasi hamda Amerikaning tijoriy yo‘lovchilarni tashishga mo‘ljallangan elektr aviataksilar ishlab chiqaruvchi Joby Aviation kompaniyasi o‘zaro hamkorlikda ilk bor uchar taksi parvozini namoyish etdi.

Interesting Engineering nashri yozishicha, parvoz shu hafta boshida Yaponiyaning Shizuoka shahridagi Toyota texnik markazida o‘tkazilgan xalqaro ko‘rgazmada bo‘lib o‘tdi. Hozircha apparat odamlarsiz uchdi, ammo o‘zining barcha imkoniyatlarini namoyish eta oldi: vertikal ko‘tarilish, tezlik va boshqarishga qulaylik kabi.

Taksi bir nafar uchuvchi va to‘rt yo‘lovchini soatiga 200 milgacha (321 km/soatdan ortiq) tezlikda tashiy olishi ta’kidlanmoqda. U atrof-muhitga zararli chiqindilar ajratmaydi, shuningdek, shovqinsiz va yuqori tezlikda harakatlana olishi bilan vertolyotlardan ustun turadi.

Yangi xizmat yo‘llardagi tirbandliklarni kamaytirish, atrof-muhitga ta’sirni minimallashtirish hamda shahar va qishloq hududlari uchun transport yechimlarini taqdim etishni maqsad qilgan. Uchar taksi parvozi Yaponiya va butun dunyodagi turli xil transport muammolarini hal etish imkoniyatlarini ko‘rsatmoqda.

Toyota va Joby kompaniyalari o‘rtasidagi yaqin hamkorlik 2019 yildayoq boshlangan, shu bilan birga Joby havo taksilarini 15 yildan ortiq vaqt davomida ishlab chiqarib kelmoqda. So‘nggi yillarda Yaponiya tomoni loyihaga kamida 500 million dollar mablag‘ sarfladi va apparatning barcha zarur sertifikatlashtirish jarayonlaridan o‘tishini tezlashtirishga erishdi. Hozirgi kunda tijoriy ishlab chiqarishga keng ko‘lamda tayyorgarlik ko‘rilmoqda. “Zamin” yangiliklarini “Youtube”da kuzatib boring