Ozarboyjon hukumati: Azerbaijan Airlines samolyoti qurol ta'siridan soʻng qulagan

^{Foto: Meiramgul Kussainova/Anadolu/picture alliance}
Ozarboyjon hukumati Bokudan Grozniyga yoʻl olgan Azerbaijan Airlines (AZAL) samolyoti qurol ta'siridan soʻng Qozogʻistonda halokatga uchraganini ilk bor ommaviy ravishda ma'lum qildi. Buni 27 dekabr, juma kuni Ozarboyjon raqamli rivojlanish va transport vaziri Rashad Nabiev amalga oshirdi.

Jurnalistlar bilan suhbatda u dastlab samolyot qushlar galasi bilan toʻqnashgani haqidagi versiya boʻlganini, biroq Nabievning soʻzlariga koʻra, samolyotning erdagi qoldiqlari va guvohlarning koʻrsatmalari tashqi ta'sir haqida gapirishga imkon berganini aytdi. «Tergov bu aralashuv qanday qurol bilan amalga oshirilganini aniqlaydi», dedi vazir.

«Jarohatlangan yoʻlovchilar va tirik qolgan bort kuzatuvchilar Grozniy uzra oʻtayotganlarida portlash ovozini eshitganliklarini aytishdi. Hatto bort kuzatuvchilardan biri qoʻlidan yaralangan. Shuningdek, ijtimoiy tarmoqlar va OAV tomonidan tarqatilgan videolavhalardan ham ma'lum boʻlishicha, ayol kishi qoʻli va oyogʻidan jarohatlangan. Bundan tashqari, samolyotning ichida va fyuzelyajida koʻzga koʻrinadigan teshiklar bor. Rossiya fuqarolari boʻlgan jabrlanuvchilar ham Grozniy uzra parvoz vaqtida uchta portlashni eshitganliklarini aytishdi. Ularning soʻzlariga koʻra, portlashlar tashqarida sodir boʻlgan, keyin esa samolyotga nimadir tegib ketgan», — dedi Nabiev.

AQSh AZAL layneri Rossiya HHM zarbasi tufayli halokatga uchragani belgilarini koʻrmoqda

Qoʻshma Shtatlar AZAL Ozarboyjon aviakompaniyasining samolyoti Rossiyaning havo mudofaa tizimi tomonidan urib tushirilganligi ehtimolini bildiradigan «ba'zi dastlabki belgilar»ni koʻrmoqda. Bu haqda Oq uydagi Milliy xavfsizlik kengashining strategik aloqalar boʻyicha koordinatori Jon Kirbi 27 dekabr kuni jurnalistlar savollariga javoban aytib oʻtdi.

Kirbi davom etayotgan tergovga tayanib, batafsil ma'lumot berishdan bosh tortdi. Qoʻshma Shtatlarda bu xulosaga kelish uchun razvedka ma'lumoti bormi yoki Vashington shunchaki ekspertlarning halokatni vizual baholashlariga asoslangan taxminlariga tayanyaptimi, degan savolga Kirbi «ha» deb javob berdi, ammo qoʻshimcha ma'lumot berishdan bosh tortdi.

Oʻz navbatida, ikki amerikalik harbiy amaldor juma kuni NBC News telekanaliga ma'lum qilishicha, AQShning razvedka ma'lumotlariga koʻra, ruslar Ozarboyjon laynerini uchuvchisiz uchoq sifatida notoʻgʻri aniqlagan va havo hujumidan mudofaa vositalarini qoʻllagan boʻlishi mumkin. Bu qisman samolyotning tartibsiz parvoz yoʻli va balandligi bilan bogʻliq boʻlishi mumkin, dedi ular. Biroq ular tergov hali ham davom etayotganini ta'kidladilar. “Zamin” yangiliklarini “Vkontakti”da kuzatib boring