Oʻzbekistonlik shifokorlar 3 kunda Afgʻonistonning 1300 dan ortiq fuqarosini koʻrikdan oʻtkazdi

25 dekabr kuni «Salomatlik» poezdida Afgʻonistonning Balx viloyatiga borgan oʻzbekistonlik shifokorlar uch kun ichida 1300 dan ortiq aholini tibbiy koʻrikdan oʻtkazdi, deb xabar berdi «Oʻzbekiston temir yoʻllari» kompaniyasiga qarashli «Temir yoʻl ijtimoiy xizmatlari» muassasasi.

15 turdagi tibbiy uskunalar bilan jihozlangan tibbiy-sanitariya poezdida 28 nafar shifokor etib borgan. Ular koʻrikni 30 dekabrga qadar davom ettiradi.

Uch kun davomida tekshirilganlarning 576 nafari erkaklar, 464 nafari ayollar va 273 nafari bolalardir.

Shu bilan birga, viloyat aholisiga 1,6 mlrd soʻmlik 50 turdagi dori-darmon va gigiena vositalari tarqatildi.






“Zamin” yangiliklarini “Telegram”da kuzatib boring