Qozogʻiston prezidenti Toʻqayev uchoqda Erni toʻrt marta aylanib chiqdi

Qozogʻiston prezidenti Qosim-Joʻmart Toʻqayev 2024 yil mobaynida samolyotda qariyb 159 ming kilometr yoʻlni bosib oʻtdi. Bu – Er sayyorasini uning belbogʻi (ekvator) boʻylab toʻrt marta aylanib chiqishga teng masofadir.

Shu tariqa Qozogʻiston prezidenti samolyot va vertolyotda jami 245 soat 18 daqiqa vaqt oʻtkazgan. Ushbu raqamlar Qozogʻiston prezidenti matbuot xizmati tomonidan hozirlangan yil yakunlariga bagʻishlangan tahlillarda aks etgan.

Qayd etilishicha, Toʻqayev yil mobaynida 23 ta xorijiy tashrifni amalga oshirgan, 19 ta xalqaro forum va sammitda qatnashgan. Xalqaro tadbirlar doirasida 27 nafar prezident bilan, 84 nafar davlat, hukumat rahbarlari va boshqa yuqori martabali mas'ullar bilan muzokara oʻtkazgan.

Qozogʻiston 2024 yil mobaynida Shanxay hamkorlik tashkiloti, Turkiy davlatlar tashkiloti, Osiyoda hamkorlik va ishonch choralari boʻyicha kengash, Kollektiv xavfsizlik shartnomasi tashkiloti, Oziq-ovqat xavfsizligi Islom tashkiloti, Orolni qutqarish xalqaro jamgʻarmasi kabi tuzilmalarda raislik qilgani Ostona tashqi siyosatidagi yutuqlar sifatida qayd etilgan.

Ma'lumot oʻrnida, Qozogʻiston prezidentining Er sayyorasini toʻrt bor aylanishga teng safarlariga Oʻzbekistonga tashrif ham kiradi. Avval xabar berganimizdek, 2024 yil aprel oyida Qosim-Joʻmart Toʻqayev Xiva shahrida Oʻzbekiston prezidenti Shavkat Mirziyoyev bilan uchrashgan edi.

Eslatib oʻtamiz, Oʻzbekiston prezidenti matbuot xizmati ham davlatimiz rahbari Shavkat Mirziyoyevning 2024 yildagi tashqi siyosiy tadbirlarga, davlat va jamiyat hayotiga daxldor voqealarga boy boʻlgan serqirra faoliyatiga doir raqamlarni e'lon qilgandi.
“Zamin” yangiliklarini “Telegram”da kuzatib boring