13:18 / 15.02.2025

AP jurnalistlari Oq uyning Oval kabinetiga kirish huquqidan mahrum boʻldi

^{Foto: AP}
The Associated Press (AP) xodimlariga Oq uyning Oval kabinetida va AQSh prezidentining Air Force One samolyotida paydo boʻlish taqiqlandi. Bu haqda 14 fevral, juma kuni Oq uy apparati rahbarining aloqa va kadrlar boʻyicha oʻrinbosari Teylor Budovich X ijtimoiy tarmogʻida yozdi.

Qaror AP oʻz nashrlarida Meksika koʻrfazining nomini Amerika koʻrfazi deb oʻzgartirishdan bosh tortganligi sababli qabul qilindi. «Associated Press Amerika koʻrfazi uchun qonuniy geografik nom oʻzgarishiga e'tibor bermaslikda davom etmoqda», dedi Budovich agentlikni «notoʻgʻri ma'lumot»da ayblab.

«Ularning mas'uliyatsiz va insofsiz reportajlar tayyorlash huquqi Birinchi tuzatish bilan himoyalangan, ammo bu ularga Oval kabinet va prezident samolyoti kabi cheklangan hududlarga toʻsiqsiz kirish imtiyozini bermaydi», deya qoʻshimcha qildi u.

Shu bilan birga, The Associated Press jurnalistlari va fotosuratchilari Oq uy majmuasiga tashrif buyurish vakolatlarini saqlab qoladilar, deya aniqlik kiritdi bosh shtab boshligʻi oʻrinbosari.

«Tramp ma'muriyati AP'ni mustaqil jurnalistika uchun jazolayapti»

The Associated Press ijrochi muharriri Juli Peys AQSh prezidenti Donald Tramp ma'muriyatining bu harakatini nomaqbul deb atadi.

«Tramp ma'muriyati AP'ni mustaqil jurnalistika uchun jazolayotgani tashvishli», dedi Peys. «AP'ning yoritishiga asoslanib, Oval kabinetga kirishimizni cheklash nafaqat jamoatchilikning mustaqil yangiliklardan foydalanishiga jiddiy toʻsqinlik qiladi, balki birinchi tuzatishni ham aniq buzadi», deb davom etdi u.

«AP uslubi nafaqat agentlik tomonidan qoʻllaniladi. AP Stylebook butun dunyo boʻylab minglab jurnalistlar va boshqa yozuvchilar tomonidan qoʻllaniladi», dedi agentlik muharrirlari.

«Dunyo boʻylab yangiliklar tarqatuvchi global axborot agentligi sifatida AP geografik nomlar barcha auditoriyaga osonlikcha tanish boʻlishini ta'minlashi kerak», deb xulosa qildi ular.

AP axborot agentligi 1846 yil may oyida Nyu-Yorkda tashkil etilgan. 2023 yilda The Associated Press jurnalistlari Rossiyaning Ukrainaga qarshi urushini yoritganliklari uchun ikkita Pulittser mukofotiga sazovor boʻldi.