Rossiya prezidenti Vladimir Putin Ukraina bo‘yicha Moskva tomonidan hech qanday yon bosish bo‘lmasligini ma’lum qildi. Uning ta’kidlashicha, Rossiya uchun tarixiy istiqbolda tinchlik va xavfsizlikni ta’minlaydigan hal qiluvchi variant zarur.
Putin: "Bizga birovning hech narsasi kerak emas, ammo o‘zimiznikini ham bermaymiz"
Rossiya prezidenti "Vatan himoyachilari" fondi xodimlari bilan uchrashuvda Ukrainadagi vaziyat yuzasidan fikr bildirdi. Uning so‘zlariga ko‘ra, Rossiya Ukrainadagi mojaroga o‘zi uchun qulay shartlar asosida tinchlik yo‘lidagi yechim topishni xohlaydi.
"Biz o‘zimizga mos keladigan shunday tinchlik variantini tanlashimiz kerakki, u uzoq tarixiy istiqbolda mamlakatimiz uchun tinchlikni ta’minlasin. Bizga tinchlik va xavfsizlik sharoitida mamlakatimizning barqaror rivojlanishini ta’minlaydigan variant kerak. Bizga birovning hech narsasi kerak emas, ammo o‘zimiznikini ham berib qo‘ymaymiz", — dedi Putin.
Moskva qanday shartlarni ilgari surmoqda?
Putin Ukrainada o‘t ochishni to‘xtatish uchun quyidagi shartlarni sanab o‘tdi:
1. Ukraina Qurolli kuchlari Donetsk va Lugansk Xalq Respublikalari, Xerson va Zaporoje hududlaridan to‘liq chiqib ketishi lozim;
2. Ukraina NATOga qo‘shilishdan voz kechishi shart.
Shu bilan birga, Moskva hududiy yon bosishlar imkoniyatini rad etdi va Yevropa davlatlari taklif etayotgan tinchlikparvar kuchlarni Ukraina hududiga joylashtirish g‘oyasini qoraladi.
Yevropa Ukrainaga tinchlikparvar qo‘shin yuborishni rejalashtirmoqda
Avvalroq, Fransiya, Buyuk Britaniya va Yevropaning boshqa davlatlari Ukrainaga tinchlikparvar kuchlar yuborish taklifi ustida ish olib borayotgani haqida xabarlar paydo bo‘lgan edi.
Telegraph nashrining ma’lumotiga ko‘ra, London va Parij Ukrainaga kamida 30 ming yevropalik harbiy yuborishni nazarda tutuvchi qo‘shma tinchlikparvarlik rejasini ishlab chiqqan.
Bu tashabbus Rossiya tomonidan keskin tanqid qilindi va Moskva Yevropa tinchlikparvar kuchlarining Ukraina hududiga kirishini qabul qilmasligini bildirdi.
Rossiya va Ukraina o‘rtasidagi mojaro qanday tus olmoqda?
Xalqaro ekspertlar fikricha, Ukrainaga Yevropa davlatlarining qo‘shin jo‘natish ehtimoli Moskva va G‘arb o‘rtasidagi ziddiyatni yanada kuchaytirishi mumkin. Rossiya buni Ukraina mojarosiga G‘arbning to‘g‘ridan to‘g‘ri aralashuvi sifatida baholashi mumkin.
Shu bilan birga, AQSH va Yevropa diplomatlari Ukrainada tinchlik o‘rnatish yo‘lida diplomatik urinishlarni davom ettirmoqda. Yaqin haftalarda tinchlik muzokaralari bo‘lib o‘tishi mumkinligi haqida ma’lumotlar paydo bo‘lmoqda.
Vaziyat qanday rivojlanishini vaqt ko‘rsatadi, ammo hozircha Rossiya ham, G‘arb ham yon bosishga tayyor emasligini ma’lum qilmoqda.
Ctrl
Enter
Xato topdIngizmi
Iborani ajratib Ctrl+Enter tugmasini bosingMavzuga oid yangiliklar
