Ukraina prezidenti Volodimir Zelenskiy Ukraina va AQSH delegatsiyalari o‘rtasida kelasi haftada muhim uchrashuv bo‘lib o‘tishini ma’lum qildi. Unga ko‘ra, ikki davlat vakillari tinchlik va xavfsizlik masalalarini muhokama qilishni rejalashtirgan.
"Ukraina va Amerika jamoalari ishni qayta tikladi va biz keyingi hafta mazmunli uchrashuv o‘tkazilishiga umid qilamiz", — deb yozdi Zelenskiy o‘z murojaatida.
Uchrashuv qachon va qayerda bo‘lib o‘tadi?
Fox News jurnalisti Jeki Xaynrix ma’lumotiga ko‘ra, muloqot 11 mart kuni Saudiya Arabistoni poytaxti Ar-Riyodda bo‘lib o‘tadi.
Muzokaralarda AQSH tomonidan:
- Davlat kotibi Marko Rubio,
- Prezidentning milliy xavfsizlik bo‘yicha maslahatchisi Maykl Uols,
- Yaqin Sharq bo‘yicha maxsus vakil Stiv Uitkoff ishtirok etishi rejalashtirilgan.
Ukraina tomonidan esa delegatsiyaga prezident ofisi rahbari Andrey Yermak boshchilik qiladi.
Muzokaralarda nimalar muhokama qilinadi?
Ukraina prezidenti ofisi rahbari Andrey Yermak ushbu uchrashuv xavfsizlik va ikki davlat o‘rtasidagi munosabatlarning kelgusi yo‘nalishlarini belgilab olishga xizmat qilishini ta’kidladi:
"Biz adolatli va mustahkam tinchlik sari keyingi qadamlarni muhokama qildik. Shuningdek, xavfsizlik masalalari va Ukraina-AQSH o‘rtasidagi pozitsiyalarni kelishish bo‘yicha fikr almashdik", — dedi Yermak.
Oldinroq AQSH milliy xavfsizlik bo‘yicha maslahatchisi Maykl Uols Vashington va Kiyev vakillari o‘t ochishni to‘xtatish bo‘yicha muzokaralarni o‘tkazish joyi va ishtirokchilari haqida muhokama olib borayotganini ma’lum qilgan edi.
Tinchlik yo‘lidagi navbatdagi qadamlar
Kelasi hafta o‘tadigan muzokaralar Ukraina va AQSH o‘rtasidagi strategik hamkorlikni yanada mustahkamlashga qaratilgan. Jumladan, tomonlar:
- Ukraina uchun xavfsizlik kafolatlari;
- O‘t ochishni to‘xtatish ehtimoli;
- Ukraina va NATO munosabatlari;
- Rossiya bilan ehtimoliy muzokaralar masalalarini muhokama qilishi mumkin.
Bu uchrashuvning qanday natija berishi hozircha noma’lum, biroq Vashington va Kiyev o‘rtasida muloqot qayta tiklangani tinchlikka erishish yo‘lida muhim qadam sifatida baholanmoqda.
Ctrl
Enter
Xato topdIngizmi
Iborani ajratib Ctrl+Enter tugmasini bosingMavzuga oid yangiliklar
