Donetskda asirga tushgan Xitoy fuqarolari haqida — urush yangi bosqichga o‘tayaptimi?

Ukrainadagi urush maydonida yangi, kutilmagan voqea qayd etildi — Ukraina Prezidenti Vladimir Zelenskiy Donetsk viloyatida Rossiya armiyasi safida jang qilgan Xitoyning ikki fuqarosi asirga tushganini ma’lum qildi. Bu haqda u ijtimoiy tarmoq orqali bayonot berdi.

Zelenskiyning so‘zlariga ko‘ra, asirga olinganlardan hujjatlar, bank kartalari va shaxsiy ma’lumotlar topilgan. Hozirda ular haqidagi ma’lumotlar tekshirilmoqda va Xitoyning urushdagi ishtiroki yuzasidan Pekin bilan diplomatik muloqot boshlangan.

Xitoy fuqarolari — Rossiya safida?
Prezident Zelenskiy ta’kidlaganidek, Rossiya armiyasining boshqa bo‘linmalari tarkibida ham Xitoy fuqarolari jang qilayotgani haqida ma’lumotlar mavjud. Bu esa urushda tashqi kuchlar ishtirokini yanada kengaytirish ehtimolini ko‘rsatmoqda.

«Bu — Putinning urushni tugatish emas, balki uni yangi darajaga olib chiqishga intilayotganini anglatadi», — dedi Zelenskiy.

Xalqaro munosabatlarga ta’siri qanday bo‘lishi mumkin?
Bu voqea Ukraina urushining yanada internatsional tus olayotganini ko‘rsatadi. Agar Xitoy rasmiylari o‘z fuqarolarining jangdagi ishtirokiga munosabat bildirsa, bu Pekinning rasmiy pozitsiyasi va dunyo hamjamiyati bilan aloqalari uchun muhim sinov bo‘ladi.

Zelenskiy Ukraina tashqi ishlar vaziriga Pekin bilan zudlik bilan bog‘lanishni buyurdi. Buning ortidan Vashington, Bryussel va boshqa xalqaro markazlardan ham munosabat kutilmoqda.

Xitoydan keyin kim?
Eslatib o‘tamiz, bu birinchi bunday holat emas. Yanvar oyida Ukraina Rossiya safida jang qilayotgan Shimoliy Koreya fuqarolarini ham qo‘lga olganini ma’lum qilgan edi. Ularning birida soxta hujjat, ikkinchisida esa umuman hech qanday hujjat topilmagan.

Zamin.uz fikri:
Jang maydonida paydo bo‘layotgan begona davlat fuqarolari — bu shunchaki statistika emas. Bu — global kuchlar o‘rtasidagi qarama-qarshilikning ochiq yuzasi. Xitoyning javobi nafaqat Ukraina, balki butun dunyo uchun signal bo‘ladi.

Hozir dunyo tinchlik kutyapti. Lekin faktlar shunday ko‘rsatmoqdaki — kimdir urushni kengaytirish yo‘lidan borishni tanlagan.

Mavzuga oid fikrlaringiz qanday? Xitoy bu holatga qanday munosabat bildirishi mumkin deb o‘ylaysiz? “Zamin”ni Telegramʻda oʻqing!