AQSH sudidan Google'ga qattiq zarba — monopoliya uchun javobgarlik

Google monopoliyasi haqida AQSH sudidan shov-shuvli qaror

Google — raqamli dunyodagi eng yirik nomlardan biri. Ammo bu muvaffaqiyat ortida noqonuniy monopoliya bormi? AQSHdagi federal sud bu savolga “ha” degandek javob berdi.

Alphabet Inc. tarkibiga kiruvchi Google kompaniyasi onlayn reklama bozorida o‘zini noqonuniy ustunlikka ega qiluvchi monopoliya yaratgani uchun sud qarorini eshitdi. Sudya Leoni Brinkemaning bayonotiga ko‘ra, kompaniyaning reklama birjalari va serverlar sohasidagi harakatlari Sherman antimonopoliya qonuniga zid.

“Bu monopoliya nafaqat raqiblarga, balki oddiy foydalanuvchilar va reklama beruvchilarga ham zarar yetkazmoqda”, — deydi sudya.

Majburiy sotuv ehtimoli — Google'ni nimalar kutmoqda?

The Wall Street Journal xabariga ko‘ra, bu qaror Google'ni ayrim reklama bizneslarini sotishga majbur qilishi mumkin. Ayni vaqtda AQSH Adliya vazirligi ushbu yo‘nalishdagi choralarni ko‘rib chiqmoqda.

Google esa bu ayblovlarga javoban:

“Biz halol raqobat asosida ish olib boramiz. Hukumatning ayblovlari eskirgan tushunchalarga asoslangan”, — degan bayonot berdi.

Qidiruv tizimidagi monopoliya uchun alohida ish

Bundan avval, 2024 yil avgustida, AQSH sudi Google'ni onlayn qidiruv sohasida ham noqonuniy usullar bilan bozorni nazorat qilgani uchun aybdor deb topgandi.

Ma’lum bo‘lishicha, kompaniya smartfon va brauzerlarga o‘z qidiruv tizimini “defolt” qilib o‘rnatish uchun 26 milliard dollar to‘lab, boshqa raqobatchilarga joy qoldirmagan.

Millardlik biznes — tahdid ostida

Google'ning reklama texnologiyalari sohasidagi faoliyati o‘tgan yili 31 milliard dollar daromad keltirgan. Bu — kompaniyaning umumiy tushumining 10 foizini tashkil etadi.

Sud qarori bu sohada katta o‘zgarishlar va Google'ni bo‘lib yuborish imkoniyatini ham ishga tushirishi mumkin. “Zamin”ni Telegramʻda oʻqing!