Rossiya va Belarus uchuvchisiz uchoqlar ishlab chiqaradigan zavod qurmoqchi

Rossiya prezidenti Vladimir Putin Belarus rahbari Aleksandr Lukashenko bilan Volgogradda bo‘lib o‘tgan uchrashuvida Belarusda uchuvchisiz uchoq apparatlari (UUA) ishlab chiqaruvchi zavod qurishga tayyorligini bildirdi. Bu haqda «Interfaks» agentligi 29 aprel kuni xabar tarqatdi.

Putinning ta’kidlashicha, Rossiya mutaxassislari belaruslik hamkasblari bilan birgalikda yangi zavod poydevorini qo‘yish va zarur laboratoriyani tashkil etishga tayyor.

Shu bilan birga, Rossiya yetakchisi ikki davlat o‘rta masofaga uchuvchi samolyotlar ishlab chiqarish bo‘yicha hamkorlik qilish imkoniyatlari haqida ham gapirgan.

Eslatib o‘tamiz, mart oyi boshida Belarus davlat axborot agentligi BelTA Rossiya tomoni Minskka Belarusda yiliga 100 mingtagacha uchuvchisiz uchoq ishlab chiqarish imkoniga ega bo‘lgan zavod qurishni taklif qilgani haqida xabar bergan edi.

Rossiya prezidenti administratsiyasi rahbari o‘rinbosari Maksim Oreshkin shu munosabat bilan: «Biz Belarusda to‘liq mahalliylashtirilgan, barcha zarur texnologiyalarni qamrab olgan va Rossiya hamda boshqa mamlakatlardagi ishlab chiqarish bazalari bilan yagona texnologik platformada ishlaydigan zavod qurishni taklif qildik. Asosiy reja – bir yil davomida yiliga 100 mingtagacha uchuvchisiz uchoq ishlab chiqaradigan ishlab chiqarish quvvatiga ega zavod barpo etishdir», – deb ma’lum qilgan edi.

Hozircha zavod qurilishi qachon boshlanishi va loyihaning umumiy qiymati haqida aniq ma’lumot berilmagan. Ammo ikki davlat hamkorligida ushbu ishlab chiqarish korxonasi yaqin muddatda tashkil etilishi mumkinligi taxmin qilinmoqda. “Zamin”ni Telegramʻda oʻqing!