Rossiya Ukrainadagi maqsadlarini o‘zgartiryaptimi? AQSH razvedkasidan yangi taxminlar

Rossiya Ukrainadagi harbiy maqsadlarini qayta ko‘rib chiqib, endi ko‘proq qisqa muddatli rejalarga e’tibor qaratishi mumkin. Bu haqda AQSH va boshqa G‘arb razvedka xizmatlariga yaqin manbalarga tayanib CNN telekanali ma’lum qildi.

Xabarda aytilishicha, Moskva endi o‘z nazoratidagi hududlarda mavjud pozitsiyalarni saqlab qolish, mudofaani kuchaytirish hamda sanksiyalar sabab og‘ir ahvolda qolgan Rossiya iqtisodiyotini yaxshilashga asosiy urg‘uni qaratmoqchi.

CNN telekanali bilan suhbatlashgan amerikalik va ukrainalik yuqori lavozimli mulozimlar fikricha, Rossiyaning strategik rejalaridagi o‘zgarishlar, asosan, Moskva va Vashington o‘rtasidagi munosabatlarni yaxshilashga bo‘lgan harakat bilan bog‘liq bo‘lishi ehtimoldan xoli emas.

Ammo, yuqori martabali mulozimlardan birining ta’kidlashicha, Rossiya hanuzgacha o‘zining asl “maksimalistik harbiy maqsadlari”dan butunlay voz kechgan emas. Ushbu maqsadlarga, xususan, Ukrainadan yangi hududlarni o‘z nazorati ostiga olish istagi ham kiradi.

Ta’kidlash joizki, AQSH razvedkasi vakillari bu yil boshidayoq prezident Donald Tramp maslahatchilariga Rossiya aynan shunday strategiyani tanlashi mumkinligini ma’lum qilgan edi.

Bu orada Kreml o‘zining pozitsiyasini yana bir marta aniq ifoda qildi. Prezident Vladimir Putinning matbuot kotibi Dmitriy Peskovning bayonotiga ko‘ra, Kremlning strategik maqsadlari harbiy amaliyot boshlangan paytdan beri o‘zgarmagan va mamlakat milliy xavfsizligini ta’minlashga yo‘naltirilgan.

Bir oy oldin ham Dmitriy Peskov Rossiya muzokaralar va tinch yo‘l bilan kelishuvga tayyorligini bildirib, bu orqali mamlakatning manfaatlari ta’minlanishi lozimligini ta’kidlagandi.

Shunday qilib, bir tomondan Rossiya o‘z nazoratidagi hududlarni mustahkamlash va iqtisodiyotini rag‘batlantirishga harakat qilmoqda, boshqa tomondan esa uzoq muddatli rejalaridan ham butunlay chekingani yo‘q. Moskva uchun muhim bo‘lgan Ukraina masalasi atrofidagi diplomatik kurashlar hali davom etishi aniq. “Zamin”ni Telegramʻda oʻqing!