Dunyodagi eng yirik elektrokema Tasmaniyada suvga tushirildi

Avstraliyaning Tasmaniya shtatida joylashgan Xobart portida tarixiy voqea ro‘y berdi — Incat kompaniyasi tomonidan qurilgan va Hull 096 deb nomlangan elektrokema rasman suvga tushirildi.

Bu nafaqat Avstraliya, balki dunyo kemasozlik sanoati uchun ham katta qadam hisoblanadi. Chunki Hull 096 faqat elektr energiyasida harakatlanuvchi eng yirik kemaga aylandi.

130 metrlik titan: Elektrda harakatlanadi, ifloslantirmaydi

Ushbu kema uzunligi bo‘yicha 130 metrni tashkil etadi va bir vaqtning o‘zida 2100 nafar yo‘lovchi hamda 225 ta avtomobilni tashish imkoniyatiga ega.

Uning eng asosiy jihati — to‘liq akkumulatorlarda ishlashidir. Kema ichiga o‘rnatilgan elektr batareyalari og‘irligi 250 tonna bo‘lib, umumiy quvvati 40 megavatt-soatdan ziyod.

Bularning barchasi sakkizta yuqori samaradorlikka ega elektr suv dvigatellariga ulangan. Ular kemaga ulkan tezlik va harakat imkoniyatini beradi.

“Bu bizning tariximizdagi eng dadil va murakkab loyiha”

Incat kompaniyasi raisi Robert Klifford Hull 096 haqida shunday dedi:

“Biz Tasmaniyada qirq yildan beri jahon darajasidagi kemalarni qurib kelyapmiz. Ammo Hull 096 — eng dadil, eng murakkab va shubhasiz, eng muhim loyihamiz. Bu kemani yaratish orqali biz nafaqat texnologiyada, balki atrof-muhit muhofazasida ham yangi bosqichga ko‘tarildik.”

Uning so‘zlariga ko‘ra, kompaniya kelajakda ekologik toza kemalarni nafaqat Avstraliyada, balki xalqaro bozorda ham keng tarqatish niyatida.

“Eng katta elektrokema va transport vositasi”

Incat'ning ma’lum qilishicha, Hull 096 nafaqat dunyodagi eng katta elektr kema, balki bugungacha yasalgan eng yirik to‘liq elektrda ishlovchi transport vositasi sifatida ham tan olinmoqda.

Incat bosh direktori Stiven Keysi o‘z fikrlarida quyidagilarni alohida qayd etdi:

“Hull 096 isbotlamoqdaki, past emissiyali, keng ko‘lamli transport vositalari nafaqat orzudir, balki bugunning o‘zida amalga oshishi mumkin bo‘lgan voqelikdir. Bu kema faqat texnik yechim emas — u kelajakning timsoli.”

Hull 096 loyihasi — elektromobillardan tashqarida ham “yashil energiya” qanday keng qo‘llanilayotganini namoyon etuvchi yaqqol misol. “Zamin”ni Telegramʻda oʻqing!