Rashida Tlaib: “AQSH Isroilning G‘azodagi genotsid harakatlarida sheriklik qilmoqda”

AQSH Kongressining Demokratik partiyadan saylangan a’zosi Rashida Tlaib Isroilning G‘azo sektoridagi harbiy harakatlarini "genotsid" deb baholadi va Qo‘shma Shtatlarni bu jarayonda sheriklikda aybladi. Uning fikricha, AQSH hukumati inson huquqlarini himoya qilishga oid shartlarsiz Isroilga milliardlab dollarlik harbiy yordam ko‘rsatib, bu mojarodagi mas’uliyatni o‘z zimmasiga olgan.

Tlaibning ta’kidlashicha, Isroil hukumati G‘azoni butunlay vayron qilish, falastinliklarni majburan ko‘chirish va hududni anneksiya qilishni maqsad qilgan. U bu harakatlarni "etnik tozalash" va "genotsid" deb atadi.

«Isroil 64 kundan beri insonparvarlik yordamining G‘azoga kirishiga to‘sqinlik qilmoqda. Urush jinoyatchisi Binyamin Netanyaxu butun Falastin aholisini majburan chiqarib yuborish, etnik tozalash, G‘azoni butunlay vayron qilish va uni anneksiya qilishni nazarda tutuvchi rejani oshkor qildi», — deb yozadi u.

Shuningdek, u AQSH ma’muriyatini insonparvarlik yordamini to‘sib qo‘ygan davlatlarga harbiy yordam ko‘rsatmaslikka chaqirdi.

Isroil hukumati esa, o‘z navbatida, G‘azoda "Hamas"ni yo‘q qilish va hududda barqaror nazorat o‘rnatish maqsadida harbiy operatsiyalarni kengaytirish rejasini tasdiqladi. Bu reja doirasida G‘azoni to‘liq egallash, fuqarolarni xavfsizlik maqsadida ko‘chirish va insonparvarlik yordamini nazorat qilish kabi choralar ko‘zda tutilgan. Bu harakatlar xalqaro hamjamiyat tomonidan qattiq tanqid qilinmoqda.

Tlaibning bayonoti AQSHdagi siyosiy muhitda keng muhokamalarga sabab bo‘ldi. Uning so‘zlari G‘azodagi vaziyatga nisbatan xalqaro e’tiborni yanada oshirdi.

Siz nima deb o‘ylaysiz: AQSHning bu mojarodagi roli qanday baholanishi kerak? “Zamin”ni Telegramʻda oʻqing!