Jahon chempionatiga keladigan muxlislarga ogohlantirish: AQSH vitse-prezidentidan jiddiy bayonot

Futbol bo‘yicha 2026 yilgi jahon chempionatiga tayyorgarlik jarayoni qizg‘in pallaga kirgan bir paytda, AQSH rasmiylari turnir davomidagi ichki tartib va xavfsizlik qoidalari borasida muhim bayonotlar berishni boshladi. AQSH vitse-prezidenti Jey Di Vens o‘zining chiqishida musobaqaga tashrif buyuradigan chet ellik muxlislarga murojaat qildi.

Vensning so‘zlariga ko‘ra, AQSH xalqi 2026 yilgi futbol festivalini keng nishonlashga tayyor va turli mamlakatlardan keladigan futbol ixlosmandlarini mamnuniyat bilan qarshi oladi. Lekin shu bilan birga, u shunday qat’iy ogohlantiruvni ham bildirdi:

“Biz muxlislarni yurtimizda qarshi olishdan xursandmiz. Ular o‘z jamoalarini stadionlardan qo‘llab-quvvatlasin, atmosferadan bahra olishsin. Biroq, turnir yakunlangach, har bir mehmon o‘z yurtiga qaytishi shart. Aks holda ular ichki xavfsizlik vaziri Kristi Noem bilan gaplashishiga to‘g‘ri keladi”, — dedi Vens sho‘xlik bilan, biroq aniq tushuntirib.

Bu bayonot orqali Amerika rasmiylari Jahon chempionati mobaynida xavfsizlik masalasiga jiddiy yondashishini yana bir bor ko‘rsatdi. Mamlakatning ichki nazorati va mehmonlarning qonuniy muddatda yurtini tark etishi borasida hech qanday imtiyoz yoki ko‘z yumish bo‘lmasligi ta’kidlandi.

Boshqa tomondan, AQSH transport vaziri Shon Daffi ham chempionat paytida yuzaga kelishi mumkin bo‘lgan logistika muammolariga yechim sifatida avtobus qatnovlarini kengaytirish rejasi haqida ma’lum qildi. Uning aytishicha, shaharlar orasidagi harakat erkinligini ta’minlash uchun zamonaviy va xavfsiz transport tizimi joriy qilinadi.

Ma’lumot uchun, 2026 yilgi futbol bo‘yicha Jahon chempionati 11 iyundan 19 iyulgacha AQSH, Kanada va Meksika hududlarida bo‘lib o‘tadi. Bu tarixdagi eng yirik mundiallardan biri bo‘ladi va uchta mamlakat birgalikda mezbonlik qiladigan ilk musobaqa sifatida qayd etiladi.

Endi esa AQSH rasmiylarining bayonotlaridan so‘ng, chempionatga keladigan har bir muxlis nafaqat sport tomoshasi, balki mamlakat qonun-qoidalariga to‘liq rioya etish zarurligini ham yodda tutishiga to‘g‘ri keladi.

Siz bu yilgi Jahon chempionatini qayerdan kuzatishni rejalashtiryapsiz? “Zamin”ni Telegramʻda oʻqing!