Tramp: «Jahon chempionatida Falastinni qo‘llab-quvvatlovchi tinch namoyishlarga to‘sqinlik qilinmaydi»

2026 yili AQSH, Kanada va Meksikada bo‘lib o‘tadigan futbol bo‘yicha jahon chempionati davomida muxlislar turli xil siyosiy va ijtimoiy masalalarda, shu jumladan Falastinni qo‘llab-quvvatlash bo‘yicha tinch namoyishlar o‘tkazish huquqiga ega bo‘ladi. Bu haqda AQSH prezidenti Donald Tramp Oq uyda FIFA prezidenti Janni Infantino bilan o‘tkazilgan qo‘shma matbuot anjumanida ma’lum qildi.

Matbuot vakillari Trampga chempionat vaqtida Falastin tarafdorlari tomonidan o‘tkazilishi mumkin bo‘lgan norozilik aksiyalari qanday qabul qilinishi, namoyishchilar cheklovlarga uchrashlari mumkinmi degan savol bilan murojaat qilganida, AQSH prezidenti insonlar o‘z fikrini erkin ifoda etish huquqiga ega ekanligini ta’kidladi.

«Hamma o‘z qarashlarini bildirish huquqiga ega va bu huquq ulardan tortib olinmaydi. Faqatgina bu namoyishlar tinch va oqilona shaklda bo‘lishi kerak. Biz insonlarning fikr erkinligini hurmat qilamiz va shuning uchun chempionat davomida turli nuqtayi nazarlarni bildirish imkoniyatini taqdim etamiz», — dedi Tramp jurnalistlar savoliga javoban.

Ushbu yirik sport musobaqasi davomida dunyoning turli mamlakatlaridan 8 milliondan ortiq muxlis Qo‘shma Shtatlarga tashrif buyurishi kutilmoqda. Futbol bayrami shuningdek, nafaqat sport musobaqalari, balki insonlar o‘rtasida muloqot va fikr almashish uchun ham muhim imkoniyat yaratadi.

FIFA prezidenti Janni Infantino ham bu masalaga munosabat bildirib, xalqaro futbol tashkiloti har qanday siyosiy qarashlarni tinch yo‘l bilan ifoda qilishga qarshi emasligini ta’kidladi. Infantinoning so‘zlariga ko‘ra, FIFA o‘z musobaqalarida inson huquqlari va demokratiya tamoyillariga hurmat bilan munosabatda bo‘lishga alohida e’tibor qaratadi.

Ma’lum bo‘lishicha, 2026 yilgi futbol bo‘yicha jahon chempionati 11 iyundan 19 iyulga qadar Shimoliy Amerikaning AQSH, Kanada va Meksika mamlakatlari maydonlarida o‘tkaziladi. Bu chempionat tarixda ilk marta uch mamlakat birgalikda mezbonlik qiladigan va ilk marta 48 jamoa ishtirok etadigan yirik musobaqa sifatida ham e’tibor qozonmoqda.

Eslatib o‘tamiz, bundan avval ham xalqaro sport tadbirlarida turli siyosiy va ijtimoiy aksiyalar o‘tkazilgan, ammo ko‘pincha bunday aksiyalar turnir tashkilotchilari va huquqni muhofaza qiluvchi organlar tomonidan cheklovlarga uchrab kelgan edi.

Bu safar esa AQSH tomonidan bildirilgan pozitsiya sport muxlislari va siyosiy faollar uchun yangi imkoniyatlar eshigini ochishi mumkin. Shu bilan birga, rasmiylar har qanday norozilik aksiyalari tinch va tartibli tarzda o‘tishini alohida nazorat qilib borishlarini ham ma’lum qilishgan. “Zamin”ni Telegramʻda oʻqing!