Vatikanda oq tutun ko‘tarildi: Yangi Rim papasi saylandi...

Dunyo katoliklari uchun eng katta voqealardan biri – yangi Rim papasining saylanishi amalga oshdi. Vatikanda joylashgan Sikstin kapellasidan ko‘tarilgan oq tutun butun insoniyat e’tiborini yana bir bor muqaddas shaharga qaratdi.

7 may kuni boshlangan konklav – ya’ni papa saylash yig‘ilishida, dunyo bo‘ylab turli mamlakatlardan kelgan 133 nafar kardinal ishtirok etdi. Vatikan qonun-qoidalariga ko‘ra, nomzod saylangan deb hisoblanishi uchun uning tarafdori bo‘lgan kardinallar soni uchdan ikki qismdan ko‘proq bo‘lishi lozim. Bu degani, kamida 89 ovoz kerak.

Birinchi ovoz berishda aniqlik kiritilmagan bo‘lsa-da, keyingi ovozdagi natija tom ma’noda tarixiy ahamiyat kasb etdi. Saylov jarayoni qat’iy maxfiylik ostida o‘tkazildi. Byulletenlar yoqilishi va ulardan chiqayotgan tutun rangi orqali jamoatchilikka ishora berib borildi.

Agar mo‘ridan qora tutun chiqqan bo‘lsa, demak nomzod yetarlicha ovoz to‘play olmagan. Oq tutun esa – yangi pontifik tanlanganini bildiradi. Bu gal Vatikan osmonida oq tutun ko‘tarildi.

Ayni paytda yangi saylangan papaning kimligi hali rasman e’lon qilinmadi. Ammo yaqin soatlar ichida u an’anaga ko‘ra, Avliyo Pyotr soboridagi markaziy oyna orqali butun jahon oldida ilk bor namoyon bo‘ladi.

Kardinallar o‘z saylovlarini o‘ta jiddiy ma’naviy mas’uliyat bilan amalga oshiradilar. Ular dunyo katolik jamoasiga rahbarlik qiladigan, millionlab insonlar qalbiga ta’sir o‘tkazadigan shaxsni tanlash vazifasini bajarmoqda.

Yangi pontifikning kimligi e’lon qilinishi bilan birga, uning tanlagan ismi, mamlakat mansubligi va diniy qarashlari ham butun dunyoda qizg‘in muhokamalarga sabab bo‘lishi shubhasiz. Zamin.uz tahririyati yangiliklarni kuzatishda davom etadi. “Zamin”ni Telegramʻda oʻqing!