Zelenskiydan 80 yillik murojaat: “Rossiya o‘zini fashizm kabi tutayapti – demilitarizatsiya shart”

8 may kuni, Yevropa mamlakatlarida Ikkinchi jahon urushi yakunlanganining 80 yilligi munosabati bilan Ukraina prezidenti Volodimir Zelenskiy xalqqa videomurojaat bilan chiqdi. Prezident Kiyev markazidagi Xreshchatik ko‘chasi bo‘ylab yurib, shaxsiy kamera orqali videomurojaat tayyorladi va jahon jamoatchiligiga murojaat qildi.

“Ukraina natsizmni yengishda ham kurash maydonida edi, endi ham shunday”

Murojaatning markaziy mavzusi — Ukraina faqat tarixda emas, balki bugungi kunda ham Yevropaning ozodligi uchun kurash olib borayotgan mamlakat ekaniga urg‘u berish bo‘ldi. Zelenskiy ta’kidlashicha, 8 milliondan ortiq ukrainalik Ikkinchi jahon urushida halok bo‘lgan va bu fojea har bir oilaning xotirasida yashab turibdi.

“Har bir uyda rasm bor. Bu nafaqat xotira, balki hushyorlik va saboqdir. Biz o‘z tariximizni eslaymiz va himoya qilamiz”, — dedi Ukraina rahbari.

Moskva paradi — “biz buni yana qila olamiz” shiori ostida

Zelenskiyning murojaatida, ayniqsa, Rossiyaning 9 may kuni o‘tkazishi kutilgan an’anaviy harbiy parad keskin tanqid ostida bo‘ldi. Prezident buni “biz buni yana qila olamiz” shioriga bog‘lab, paradning tarixi va ma’naviy mohiyati buzib ko‘rsatilayotganini ta’kidladi.

“Buchada ommaviy qabrlar tashkil etganlar fashizm haqida gapirmoqda. Mariupolni blokada qilganlar Leningrad blokadasini eslashmoqda. Ular tarixni faqat qaytarish uchun emas, balki uni tahqirlash uchun ishlatyapti”, — deya so‘zlarini shiddat bilan aytdi Zelenskiy.

“Agar Rossiya o‘zgarmasa — uni demilitarizatsiya qilish kerak”

Zelenskiy so‘nggi fikrlarini yanada keskin tarzda ifoda etdi. Unga ko‘ra, agar Rossiya o‘z siyosatini o‘zgartirmasa, xalqaro hamjamiyat uni “demilitarizatsiya qilish” masalasini ko‘rib chiqishi shart.

“Rossiya o‘zini o‘zgartiradi yoki uni to‘xtatish uchun butun dunyo harakat qiladi. Urush, tajovuz va fashizm belgilarini takrorlaydigan tuzumga qarshi javob talab etiladi”, — dedi u.

Yevropa, jumladan, dunyo o‘zgarish ostonasida turibdi — tinchlik va adolat o‘rtasidagi kurash hali ham davom etmoqda. “Zamin”ni Telegramʻda oʻqing!