Hindiston bosh vaziri: "Navbatdagi xato Pokistonni xaritadan o‘chirishi mumkin"

Hindiston va Pokiston o‘rtasidagi keskinlik yana avj oldi. 12 may kuni Hindiston bosh vaziri Narendra Modi mamlakat xalqiga murojaat qilib, terrorizmga qarshi kurashda davlatning qat’iy pozitsiyasini bildirdi va Islomobodga ochiq ultimatum yo‘lladi.

"Sindur" operatsiyasi va ehtimoliy davomi

Modi nutqida 7 may kuni amalga oshirilgan "Sindur" harbiy operatsiyasi faqat to‘xtatilganini, yakunlanmaganini va Hindiston har qanday paytda uni qayta boshlashga tayyor ekanini ta’kidladi. Uning ta’kidlashicha, terrorchilik xurujlariga nisbatan keskin javob qaytariladi va bugungi tanaffus Pokistonning keyingi qadamlarini baholash uchun beriladigan vaqt, xolos.

"Biz terrorchilar va ularni qo‘llab-quvvatlayotgan harbiy bazalarga qarshi javob choralarini faqat vaqtincha to‘xtatdik. Agar yangi hujum bo‘lsa, javobimiz keskin va hal qiluvchi bo‘ladi", dedi Modi.

Xavfsizlik to‘g‘risida ogohlantirish

Hindiston havo marshali Avadesh Kumar Bharti ham matbuot anjumanida mamlakat harbiylari har qanday vaziyatga javob berishga tayyor ekanini bildirdi. Uning ta’kidlashicha, barcha harbiy infratuzilmalar yuqori darajada tayyor holatga keltirilgan.

Muzokaralar faqat Kashmir va terrorizm haqida

Modi o‘z murojaatida Hindistonning pozitsiyasini ochiq bayon qildi: "Hindiston va Pokiston o‘rtasidagi har qanday muzokara faqat ikki masalada bo‘ladi — terrorizm va Kashmir. Savdo va tinchlik parallel olib borilishi mumkin emas."

Bosh vazir Pokiston hukumatini va armiyasini terrorchilikni qo‘llab-quvvatlashda ayblab, agar ular buni to‘xtatmasa, "Pokistonning mavjudligi xavf ostida qolishi" haqida ogohlantirdi.

Pokistonning javobi

Pokiston mudofaa vaziri Xavaja Asif esa o‘z chiqishida Pokistonni terrorizm manbai emas, balki uning qurboni sifatida ko‘rsatdi. U Pokistonning Hindiston bilan uchta asosiy masala: Kashmir, terrorizm va suv masalalari yuzasidan muzokara qilishga tayyorligini ma’lum qildi.

Pokiston Hindistonning 2019 yilda Jammu va Kashmir shtatini tugatib, uni ittifoq hududiga aylantirish qarorini tanqid qildi va Kashmirni Hindiston ishg‘oli deb baholadi.

Xalqaro xavotir va kelajak tahdidlar

Qo‘shma Shtatlar va boshqa xalqaro kuchlar har ikki tomonni ziddiyatni eskalatsiya qilmaslikka, muzokaralar orqali yechim izlashga chaqirmoqda. Hindiston va Pokiston yadro quroliga ega davlatlar ekani munosabati bilan har qanday harbiy to‘qnashuv xalqaro miqyosda jiddiy xavotir uyg‘otmoqda.

Zamin.uz tahririyati bu inqirozda tinch va diplomatik yechimlar ustuvor bo‘lishi kerak, deb hisoblaydi va har ikki tomonni o‘zini tiyib turishga chaqirishga qo‘shiladi. “Zamin”ni Telegramʻda oʻqing!