Airbus samolyoti havoda 10 daqiqa boshqaruvchisiz parvoz qildi

Lufthansa aviakompaniyasining Frankfurt–Sevilya yo‘nalishidagi Airbus A321 bortida 2024 yil 17 fevral kuni xavfli holat yuz berdi. Germaniyaning Bild nashri va Ispaniya aviatsiya hodisalarini tekshirish komissiyasi ma’lumotlariga ko‘ra, samolyot parvoz vaqtida bir necha daqiqa davomida boshqaruvchisiz qolgan.

Hodisa 10 700 metr balandlikda sodir bo‘lgan. Kapitan hojatxonaga chiqqani sababli kabinada ikkinchi uchuvchi yolg‘iz qolgan va aynan shu paytda u to‘satdan hushidan ketgan. Samolyot avtopilotga o‘tgan bo‘lsa-da, uchuvchining tana holati tufayli avialayner biroz yo‘nalishdan chetga chiqqan.

Bosh pilot qaytib kelishga harakat qilgan, biroq kabina eshigi qulflanib qolgan va ikkinchi uchuvchi tasdiqlamasdan turib eshik kodini kiritish samara bermagan. Bu holatda samolyot muvozanatda turishda davom etgan bo‘lsa-da, vaziyat jiddiy xavf tug‘dirgan.

Faqat sakkiz daqiqadan so‘ng ikkinchi uchuvchi hushiga kelib, eshikni qo‘lda ochgan. Kapitan darhol boshqaruvni o‘z qo‘liga olgan va Madridda muvaffaqiyatli ravishda favqulodda qo‘nish amalga oshirilgan.

Komissiya xulosasida ta’kidlanishicha, uchuvchining to‘satdan hushidan ketishi unda avvaldan tashxislanmagan nevrologik muammoga bog‘liq bo‘lgan.

Zamin.uz tahririyatidan:
Ushbu voqea yuqori texnologik tizimlarga qaramay, inson omili aviatsiyada hal qiluvchi ahamiyatga ega ekanini yana bir bor tasdiqlamoqda. Tijorat parvozlarida uchuvchilar sog‘lig‘i ustidan nazorat yanada kuchaytirilishi kerakmi? Siz bu holat haqida nima deb o‘ylaysiz? “Zamin”ni Telegramʻda oʻqing!