Yaponiya kemasi Rossiya bilan bahsli hududda pulemyotdan o‘q uzdi!

Yaponiya sohilni qo‘riqlash xizmatining patrul kemasi 23 may kuni Hokkaydo oroli yaqinida, Rossiyaning Saxalin viloyatiga qarashli Kunashir oroli atrofidagi bahsli hududda to‘satdan pulemyotdan o‘q uzib, harbiy mashg‘ulot o‘tkazgani xabar qilindi.

Yaponiyaning mashhur telekanali NHK tarqatgan xabarga ko‘ra, patrul kemasi oldindan hech qanday navigatsiya ogohlantirishi bermasdan, ushbu mintaqada o‘quv mashg‘ulotlari olib borgan va pulemyotdan 66 marta o‘q uzgan. Kema ekipaji o‘z xatolarini tushunib yetgach, vaziyatning jiddiyligini anglab, darhol mashg‘ulotni to‘xtatgan.

Bu hodisa ko‘pchilikda jiddiy xavotirlarni uyg‘otdi. Chunki mashg‘ulot o‘tkazilgan hudud Yaponiya va Rossiya o‘rtasidagi tarixiy bahsli hudud — Kuril orollari arxipelagida joylashgan bo‘lib, undagi eng yirik orollardan biri bo‘lgan Kunashir oroliga juda yaqin masofadadir.

Hodisa yuzasidan Yaponiya sohilni qo‘riqlash xizmati darhol chora ko‘rishga va’da berdi. Xizmat mutasaddilari bu kabi holatlarning kelgusida takrorlanmasligi uchun qat’iy chora-tadbirlar ko‘rilishini ma’lum qilishdi. Shuningdek, xizmat xodimlari xavfsizlik va navigatsiya masalalari bo‘yicha qo‘shimcha tayyorgarlikdan o‘tishi shart ekani aytildi.

Eslatib o‘tamiz, Kunashir oroli uzoq yillardan buyon Rossiya va Yaponiya o‘rtasidagi hududiy bahsning markaziy nuqtalaridan biri hisoblanadi. Ikkala davlat ham ushbu orollarga o‘z huquqlarini da’vo qiladi. Bu hudud atrofida har qanday harbiy faoliyat ikki davlat o‘rtasidagi munosabatlarga jiddiy ta’sir ko‘rsatishi mumkin.

Shuning uchun ham Yaponiya sohilni qo‘riqlash xizmati tomonidan amalga oshirilgan bunday ogohlantirishsiz mashg‘ulot jamoatchilik va xalqaro kuzatuvchilarning jiddiy e’tirozlariga sabab bo‘lishi mumkin.

Mutaxassislar ushbu voqeaning ikki mamlakat o‘rtasidagi munosabatlarga salbiy ta’sir o‘tkazishi mumkinligidan xavotirda. Shu bois, ikki davlat diplomatlari vaziyatni keskinlashtirmaslik va bu kabi holatlarning oldini olish uchun tegishli muzokaralar olib borishi muhim hisoblanadi.

Hozircha Rossiya tomonidan rasmiy munosabat bildirilmadi. Ammo, voqeaning xalqaro darajadagi aks-sadosi kutilmoqda. Zero, bahsli hududlarda harbiy xarakterdagi hatti-harakatlar doimo jiddiy siyosiy munosabatlarga sabab bo‘lgan.

Bu voqea ikki davlat o‘rtasidagi diplomatik munosabatlarning yana bir bor sinovdan o‘tishiga sabab bo‘ladigan ko‘rinadi. “Zamin”ni Telegramʻda oʻqing!