Ilon Mask hukumatdagi vazifasini tark etdi: Trampga minnatdorchilik, loyihalarga esa tanqid

Mashhur tadbirkor va texnologik gigantlar rahbari Ilon Mask Amerika hukumatidagi rasmiy vazifasini tark etganini ma’lum qildi. 29 mayga o‘tar kechasi u o‘zining X (sobiq Twitter) ijtimoiy tarmog‘idagi sahifasida shu haqda bayonot berdi. Maskning so‘zlariga ko‘ra, u “maxsus hukumat xodimi” sifatidagi faoliyatini yakunlagan.

— Menga bu muddat mobaynida samaradorlikni oshirish va be’maniliklarni qisqartirish imkonini yaratgani uchun prezident Donald Trampga minnatdorchilik bildirmoqchiman, — deb yozdi Mask.

U rahbarlik qilgan Hukumat samaradorligi departamenti (DOGE) haqida ham to‘xtalib o‘tdi. Unga ko‘ra, mazkur tashabbus kelajakda yanada kuchayadi va barcha davlat muassasalari uchun turmush tarziga aylanadi.

DOGEga zarba beradigan qonun loyihasi

Bundan bir kun oldin, 28 may kuni CBS telekanali Ilon Mask bilan bo‘lib o‘tgan intervyudan parchani X sahifasida taqdim etdi. Intervyu to‘liq shaklda 1 iyun, yakshanba kuni efirga uzatiladi. Unda tadbirkor AQSHda muhokama etilayotgan yangi qonun loyihasi haqida fikr bildirdi.

Mask, xususan, Donald Tramp taklif etayotgan “katta va chiroyli” qonun loyihasini keskin tanqid qildi. Uning fikricha, bu hujjat davlat budjetidagi xarajatlarni keskin oshirishi va o‘zining DOGE loyihasini zaiflashtirishi mumkin.

— Men ushbu loyihani ko‘rib, hafsalam pir bo‘ldi. Bunaqa keng qamrovli va qimmat qonun DOGE'ning falsafasiga mutlaqo zid, — dedi Mask.

Faoliyat tugadi, ta’sir qolmoqda

Ilon Maskning hukumatdagi ishtiroki hech qachon rasmiy vazirlik yoki klassik siyosiy lavozim bilan bog‘liq bo‘lmagan, lekin u davlat ichidagi samaradorlikni oshirish va byurokratik tizimni isloh qilishga qaratilgan tashabbuslarni ilgari surgan edi. DOGE nomi (Government Efficiency) internetdagi yumorga asoslangan kriptovalyuta — Dogecoin bilan ham o‘xshashligi bois keng muhokamalarga sabab bo‘lgandi.

Endilikda Ilon Mask o‘z faoliyatini xususiy sektorda davom ettirishi va yangi texnologik yo‘nalishlarga e’tibor qaratishi kutilmoqda. Ammo u siyosiy maydondan butunlay chetlashgani yo‘q. Uning X sahifasidagi bildirishlari, bayonotlari va izohlari ko‘pincha jamoatchilikda shov-shuvli muhokamalarga sabab bo‘ladi.

Zamin.uz tahririyati eslatadi: Mask siyosiy qarashlari va shijoati bilan dunyodagi texnologiya, iqtisod va siyosat chegaralarini bir nuqtada tuta olgan kam sonli liderlardan biri hisoblanadi. Uning navbatdagi qadamlari ham katta qiziqish bilan kuzatiladi.