Nyu-Yorkda ISЕga qarshi namoyish: 80dan ortiq namoyishchi qo‘lga olindi

Nyu-York shahrida AQSH Immigratsiya va bojxona nazorati (ICE) xizmatining deportatsiya reydlariga qarshi yirik norozilik aksiyasi uyushtirildi. Namoyish paytida 80 dan ortiq ishtirokchi politsiya tomonidan hibsga olindi. Bu haqda New York Post nashri huquq-tartibot organlaridagi manbalarga tayanib xabar berdi.

Ma’lum qilinishicha, seshanba kuni Quyi Manxetten ko‘chalarida to‘plangan norozi fuqarolar ICE'ning so‘nggi harakatlariga qarshi ovoz ko‘tarishdi. Namoyishchilar yo‘llarni to‘sib, baqir-chaqir va transparantlar bilan chiqish qildi, ba’zilari esa politsiya xodimlariga turli buyumlar otgan.

Politsiyaning bildirishicha, ayrim namoyishchilar huquq-tartibot idoralari talablariga bo‘ysunmagani va jamoat tartibini buzgani uchun hibsga olindi. Hozirda ushlangan shaxslarga nisbatan ma’muriy va jinoiy ish yuritish ishlari olib borilmoqda.

Mahalliy fuqarolik guruhlari va inson huquqlari faollari bu harakatni Konstitutsiyaviy huquq — so‘z erkinligidan foydalanish deb atashmoqda. Ular ICE siyosatlarini “insonparvarlikka zid” deb baholab, deportatsiya jarayonlarining qayta ko‘rib chiqilishini talab qilmoqda.

Namoyish mamlakat miqyosidagi ko‘plab muhokama va tortishuvlarga sabab bo‘ldi. ICE va boshqa davlat idoralari esa o‘z faoliyatlarini qonuniy deb hisoblashda davom etmoqda.

Zamin.uz tahririyati AQSHdagi bu kabi muhim ijtimoiy-siyosiy voqealarni kuzatishda va o‘z o‘quvchilarini tezkor axborot bilan ta’minlashda davom etadi.