Eron yangi qo‘mondoni tahdid qildi: “Do‘zax eshiklari ochiladi”

Yaqin Sharqdagi ziddiyat yanada kuchaymoqda. Eron Islom Inqilobi Qo‘riqchilari Korpusi (IIQK) yangi rahbar qo‘l ostida Isroilga qarshi qattiq bayonotlar bilan chiqmoqda. Yaqinda IIQKning bosh qo‘mondoni etib tayinlangan general Muhammad Pakpur ilk nutqida Isroilga “do‘zax eshiklari” ochilishini va’da qildi. Uning so‘zlarini Mehr axborot agentligi tarqatdi.

Pakpur o‘z chiqishida Isroilning Eron milliy xavfsizligi va hududiy yaxlitligiga nisbatan amalga oshirgan harbiy tajovuzini qattiq qoralab, bu harakatlar javobsiz qolmasligini ta’kidladi. Uning ta’biri bilan aytganda, “Eronning sabri ham chegarali, biz tinchlikni xohlaymiz, ammo tahdidlarga qarshi qattiq javob berishga tayyormiz”.

Eslatib o‘tamiz, 13 iyunga o‘tar kechasi Isroil tomonidan “Arslon millati” deb nomlangan harbiy operatsiya boshlangan edi. Bu murakkab va sinxronlashtirilgan operatsiya doirasida Isroil havo kuchlari Eron hududida joylashgan yuzdan ortiq strategik obyektlarga zarbalar berdi. Ularning orasida IIQK qarorgohlari, yadro infratuzilmalari va yuqori lavozimdagi harbiylar ham bor edi.

Rasmiy ma’lumotlarga ko‘ra, hujum natijasida IIQK qo‘mondoni Husayn Salamiy, Bosh shtab boshlig‘i Muhammad Bag‘iriy, hamda yadro sohasidagi yetakchi olimlar halok bo‘lgan. Eronning NourNews axborot agentligi e’lon qilgan ma’lumotlarga ko‘ra, bu zarbalar faqat harbiylar emas, balki tinch aholiga ham og‘ir oqibatlar keltirgan. Tehron shahrining o‘zida 78 nafar fuqaro halok bo‘lgani, yana 329 kishi yaralangani qayd etilgan.

Bu voqealar Yaqin Sharqdagi keskinlikni yanada avj oldirdi. Xalqaro ekspertlar taxmin qilishicha, Eron yangi qo‘mondon qo‘l ostida Isroilga nisbatan kuchli va qattiq javob choralarini ishlab chiqishi mumkin. Muhammad Pakpurning shiddatli bayonoti bu yo‘nalishdagi ilk ishora sifatida baholanmoqda.

Muxlislar va siyosiy tahlilchilar bu rivojlarni diqqat bilan kuzatishmoqda. Erondagi siyosiy va harbiy muhit yanada shiddatlanar ekan, butun mintaqa yangi xavfli bosqichga kirganini ko‘rsatmoqda. “Zamin”ni Telegramʻda oʻqing!