Aloqador davlatlarga tahdid: Eron yangi mojaroga tayyor ekanini bildirmoqda

Yaqin Sharqda vaziyat yanada keskinlashmoqda – Eron Isroilga hujum qilishda unga yordam bergan davlatlarga kuchli javob zarbasi berishga tayyor ekanini ma’lum qildi. Mahalliy va xalqaro nashrlarda tarqalgan xabarlarga ko‘ra, Eron bu tahdidni Fransiya, Buyuk Britaniya va AQSHga ochiq ogohlantirish sifatida yetkazgan.

Fars agentligining ma’lum qilishicha, Eron rasmiylari o‘z hududiga qilingan har qanday zo‘ravonlikka javoban, Isroilning mintaqadagi ittifoqchilari — ya’ni Fors ko‘rfazidagi Amerika va Isroil bazalari, shuningdek, Yaqin Sharqda joylashgan AQSH harbiy bazalari va Qizil dengizdagi harbiy kemalar ham nishonga olinishi mumkinligini ta’kidladi. Tehron bu davlatlarni nafaqat so‘z bilan, balki amaliy zarbalar orqali ham ogohlantirishga tayyor ekanini bildirmoqda.

Vaziyatga turtki bo‘lgan asosiy voqea – 13 iyunga o‘tar kechasi Isroil Eron hududidagi yadro va harbiy infratuzilma obyektlariga keng ko‘lamli zarbalarni amalga oshirdi. Oqibatda, rasmiy ma’lumotlarga ko‘ra, Erondagi yuqori lavozimli harbiylar va yadro sohasidagi olimlardan bir nechtasi halok bo‘ldi. Jami 78 kishi halok bo‘lgani, 320 nafardan ziyod odam jarohatlangani qayd etildi. Afsuski, qurbonlar orasida tinch aholi vakillari ham bor.

Eron ushbu zarbalarga javoban 13 iyun kuni kechqurun Isroilga qarata raketalar otgani haqida rasmiy bayonot berdi. OAV ma’lumotlariga ko‘ra, ushbu javob natijasida 4 kishi halok bo‘ldi va 70 dan ortiq odam turli darajada tan jarohati oldi.

Shu tariqa, mintaqadagi xavotir va keskinlik yanada ortmoqda. Eronning aniq va ochiq tahdidi nafaqat Isroilga, balki uning strategik hamkorlari bo‘lgan Fransiya, Britaniya va AQSHga ham yo‘naltirilgani – Yaqin Sharqda har qanday yangi urush yoki to‘qnashuv keng masshtabdagi xalqaro oqibatlarga olib kelishi mumkinligini ko‘rsatmoqda. Bugungi vaziyatda har bir taraf o‘ta ehtiyotkor va mas’uliyatli bo‘lishi talab etilmoqda. “Zamin”ni Telegramʻda oʻqing!